რატომ უნდა შევიძინოთ ფეხსაცმელი საღამოს?

ფეხსაცმელი რომ არა მარტო მოდური, არამედ, აგრეთვე, კომფორტული, გამძლე და ჰიგიენური უნდა იყოს, ამაზე საუბარს არ მოვყვებით, უბრალოდ, შეგახსენებთ, რომ ფეხსაცმლის ყიდვისას შემდეგი ფაქტორები გაითვალისწინოთ:

* აირჩით ფეხსაცმელი, რომელიც არ გიძნელებთ მოძრაობას, ტერფს დაზიანებისა და დეფორმაციისგან იცავს, არ აზიანებს კანს.

* ახალი ფეხსაცმლის გასინჯვისას ფეხზე უნდა იდგეთ, აუცილებლად გადადგით რამდენიმე ნაბიჯი, რადგან სიარულისას ტერფის ზომა ყოველთვის იცვლება. სპეციალისტები გვირჩევენ, რომ ფეხსაცმელი საღამოს გავიზომოთ – მაშინ, როდესაც მთელი დღის განმავლობაში სიარულის გამო ფეხები ოდნავ შესიებულია.

* ფეხსაცმელში ფეხის თითები თავისუფლად უნდა მდებარეობდეს. ამასთანავე, ნუ დაივიწყებთ, რომ ზომაზე მეტად თავისუფალმა ფეხსაცმელმა შეიძლება ფეხის გადაგიტყავოთ ან სულაც კოჟრი გაგიჩინოთ.

* ღია მოდელები, მაგალითად, ნავის ფორმის ფეხსაცმელი აუცილებლად მჭიდროდ უნდა ეკვროდეს ტერფს, განსაკუთებით ქუსლს.

* ყოველდღიურად ჩაცმისთვის რეკომენდებულია სამი-ხუთი სანტიმეტრი სიმაღლის ქუსლის მქონე ფეხსაცმელი. ზომაზე მაღალ და წვრილ ქუსლზე სიარული ფეხის უკანა კუნთების კუმშვასა და წინა კუნთების გაგანიერებას იწვევს; ფეხი ადრე იღლება, იმატებს ტრავმების რისკი.

* ე. წ. პლატფორმა ფეხსაცმლის ქუსლსა და ცხვირს შორის სიმაღლის მკვეთრი ცვლილება არ არის და, აქედან გამომდინარე, არ იძაბება ფეხის ტერფი თითის წვერებიდან ქუსლამდე, მაგრამ ამ სტილის ფეხსაცმელს თავისი უარყოფითი მხარეც აქვს – როდესაც პლატფორმა ფეხსაცმელი გვაცვია, სავალი ზედაპირის უსწორმასწორობას ვერ ვგრძნობთ, რაც ფეხის გადაბრუნებისა და დაზიანების საფრთხეს ქმნის.

კარგი იქნება, თუ ამ რჩევებს გაითვალისწინებთ, როდესაც ახალი ფეხსაცმლის ყიდვას დააპირებთ. მთავარი არ დაგავიწყდეთ: ფეხსაცმელი საღამოს მოისინჯეთ და ისე შეიძინეთ.

კირა კარიაული