მოერიდეთ სამხრეთ ევროპაში ბანაობას: რეგიონში ვრცელდება მტკნარი წყლის ლოკოკინებით გამოწვეული ინფექციური დაავადება
სამხრეთ ევროპის ქვეყნებში ბანაობა სულ უფრო სარისკო ხდება. შისტოსომოზი არის ტროპიკული ინფექციური დაავადება, რომელიც ადამიანებზე მტკნარი წყლის ლოკოკინების მეშვეობით გადადის. მისი გამომწვევები პარაზიტული ჭიები არიან. კლიმატის ცვლილების გამო ბაქტერია სულ უფრო მდგრადი ხდება.
ამ საფრთხეზე ყურადღება ლეუვენის (ბელგია) კათოლიკური უნივერსიტეტისა და და ქალაქ ტერვიურენში მდებარე „აფრიკის მუზეუმის“ მეცნიერებმა გაამახვილეს, რომლებმაც შესაბამისი კვლევა ჩაატარეს.
როგორია დამსვენებელთა ინფიცირების და მათი ჯანმრთელობის დაზიანების რისკები?
მიუხედავად იმისა, რომ ეს საფრთხე ბელგიას უშუალოდ არ ემუქრება, დამსვენებელთა შორის ამ დაავადებით ინფიცირებულთა რაოდენობის ზრდა მაინც მოსალოდნელია. ინფიცირებისთვის კი კანთან მარტივი კონტაქტიც საკმარისია.
„თუ ეს ინფექციური დაავადება ხანგრძლივ ან ქრონიკულ ხასიათს მიიღებს, არსებობს ღვიძლის ფიბროზის, საშარდე გზების და თირკმელების ინფექციის, უნაყოფობის და კიბოს განვითარების რისკიც კი. ბავშვებში ამან შეიძლება გამოიწვიოს სიმაღლეში ზრდის ან გონებრივი განვითარების შეფერხება“, – განმარტავს ლეუვენის კათოლიკური უნივერსიტეტისა და და „აფრიკის მუზეუმის“ სტუდენტი-მკვლევარი, ბენჯამინ ანდრე.
მიუხედავად იმისა, რომ დაავადება, ძირითადად, აფრიკაშია გავრცელებული, უკვე რამდენიმე წელია, დაავადების შემთხვევები კორსიკასა და ესპანეთშიც ფიქსირდება. გლობალური დათბობის ევოლუციაზე დაფუძნებული სამეცნიერო პროგნოზების მიხედვით, დაავადება მთელ სამხრეთ ევროპაში უნდა გავრცელდეს.
ამ დაავადების მკურნალობა შესაძლებელია, მაგრამ ეს ვერ აჩერებს მის გავრცელებას. ამიტომ, მეცნიერები პრევენციას იმ ადამიანების ცნობიერების ამაღლებაში ხედავენ, რომლებიც ამ რეგიონებში მოგზაურობენ.
შისტოსომოზი მალარიის შემდეგ მსოფლიოში ყველაზე გავრცელებული ინფექციური დაავადებაა, რომლითაც ყოველწლიურად, საერთო ჯამში, 200 მილიონზე მეტი ადამიანი ინფიცირდება.
კომენტარები