პოლიტიკა

საქართველოს პარლამენტს ახალი თავმჯდომარე ჰყავს – ვინ არის შალვა პაპუაშვილი

საქართველოს პარლამენტმა დღეს, 2021 წლის 29 დეკემბერს ახალი თავმჯდომარე  აირჩია – შალვა პაპუაშვილს 88-მა დეპუტატმა მისცა ხმა ერთის წინააღმდეგ. პარლამენტის თავმჯდომარის ასარჩევად 76 ხმა იყო საჭირო.

შალვა პაპუაშვილი 26 იანვარს 46 წლის ხდება (დაიბადა 1976 წელს). უმაღლესი განათლება საქართველოსა და გერმანიაში აქვს მიღებული – 1998 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის საერთაშორისო სამართლისა და საერთაშორისო ურთიერთობების ფაკულტეტი საერთაშორისო სამარათლის სპეციალობით, 1998-2002 წლებში გერმანიის აკადემიური გაცვლის სამსახურის (DAAD) სტიპენდიით სწავლობდა ზაარლანდის უნივერსიტეტში (გერმანია), სადაც 1999 წელს მიენიჭა სამართლის მაგისტრის ხარისხი, ხოლო 2002 წელს – სამართლის დოქტორის ხარისხი.

2020 წლის 31 ოქტომბერს შალვა პაპუაშვილი, „ქართული ოცნება – დემოკრატიული საქართველოს“ პარტიული სიით აირჩიეს საქართველოს პარლამენტის მეათე მოწვევის წევრად. 2020 წლის 15 დეკემბერს აირჩიეს განათლების, მეცნიერებისა და კულტურის კომიტეტის თავმჯდომარის პირველ მოადგილედ; ხოლო 2021 წლის 31 მარტს – განათლებისა და მეცნიერების კომიტეტის თავმჯდომარედ. არის ფრაქცია „ქართული ოცნება – დემოკრატიული საქართველოს“ წევრი. 2021 წლის 16 იანვრიდან არის პარტია „ქართული ოცნება – დემოკრატიული საქართველოს“ პოლიტიკური საბჭოს წევრი, ხოლო 2021 წლის 27 მარტიდან – პარტიის საზოგადოებასთან ურთიერთობის მდივანი.

შალვა პაპუაშვილი 2003-2007 წლებში იყო გერმანიის ტექნიკური თანამშრომლობის საზოგადოების (GTZ) სამართლის ექსპერტი. 2007-2017 წლებში ხელმძღვანელობდა სამხრეთ კავკასიის ქვეყნებში გერმანიის საერთაშორისო თანამშრომლობის საზოგადოების (GIZ) სამართლის პროგრამის სხვადასხვა მიმართულებას, ხოლო 2017-2020 წლებში იყო სამართლის პროგრამის საქართველოს გუნდის ხელმძღვანელი.

2012 წლიდან კითხულობს ლექციებს სხვადასხვა უნივერსიტეტში, არის ილიას სახელმწიფო უნივერსიტეტის ასოცირებული პროფესორი.

შალვა პაპუაშვილი სამართლის სფეროში რამდენიმე ნაშრომის ავტორია, ფლობს ინგლისურ, გერმანულ და რუსულ ენებს.

კახა კუჭავამ საქართველოს პარლამენტის თავმჯდომარის თანამდებობა 24 დეკემბერს დატოვა, არჩევიდან (2021 წლის 27 აპრილი) 8 თვის შემდეგ.

კომენტარები

Tags

Related Articles

Leave a Reply

Your email address will not be published. Required fields are marked *

Back to top button
გაზიარება
Close