ესპანეთში, კანარის კუნძულებზე ვულკანის ამოფრქვევა დაიწყო (ვიდეო)
ესპანეთში, კუნძულ ლა პალმაზე ვულკანის ამოფრქვევა დაიწყო. ამოფრქვევას სეისმური ბიძგების სერია უძღვოდა წინ. ამის შესახებ ადგილობრივი მედია წერს.
კანარის კუნძულების ვულკანოლოგიის ინსტიტუტის ცნობით, ბოლო ერთი კვირის განმავლობში კუნძულ პალმაზე, ვულკან კუმბრე ვიეხას (Cumbre Vieja) რაიონში 25 ათასზე მეტი მიწისქვეშა ბიძგი დაფიქსირდა. ყველაზე ძლიერი, რიხტერის სკალით 4,2 მაგნიტუდის სიმძლავრის მიწისძვრა კვირას, 19 სექტემბერს მოხდა.
ვულკანის ამოფრქვევის საფრთხის გამო კვირა დილიდან ადგილობრივმა მთავრობამ შეზღუდული შესაძლებლობის მქონე პირების ევაკუაცია დაიწყო. საგანგებო სიტუაციების მართვის სამსახური მოქალაქეებს მოუწოდებდა, ვულკანის მიმდებარე რაიონებს გარიდებოდნენ.
ესპანეთის პრემიერ-მინისტრ პედრო სანჩესის განცხადებით, ცენტრალური მთავრობა ვითარებას აკვირდება და საჭიროების შემთხვევაში ლა პალმას მხარდასაჭერად მზად არის.
ნგრევის და მსხვერპლის შესახებ ინფორმაცია არ ვრცელდება, თუმცა ადგილობრივი მთავრობის განცხადებით, რამდენიმე გზა დაზიანდა.
ვულკანოლოგმა სტავროს მელეტიდესმა „როიტერსს“ უთხრა, რომ ამოფრქვევის შედეგად ვულკანის ფერდებზე 5 ნაპრალი წარმოიქმნა და ამ დროისთვის არავის შეუძლია თქვას, რამდენ ხანს გაგრძელდება პროცესი.
კუნძული პალმა ვულკანური წარმოშობისაა, მის ცენტრალურ ნაწილში ვულკანების მწკრივია. ბოლოს აქ მასშტაბური ამოფრქვევა 1971 წელს მოხდა, როდესაც ვულკანმა ტენეგიამ გაიღვიძა.
Si hubiera salido en otro lugar y no se hubiera llevado ya casas por delante sería para disfrutar de lo que hace la naturaleza. Una pena que haya ya pérdidas para gente. pic.twitter.com/koH9MPRAAo
— Víctor Hernández Molina (@victorhdez233) September 19, 2021
მანანა ბანძელაძე
კომენტარები