რა წესების დაცვა მოუწევთ მოქალაქეებს ავიაკომპანია WIZZ AIR-ით მგზავრობისას

ავიაკომპანია Wizz Air-ის კორპორაციული კომუნიკაციების ხელმძღვანელმა ანდრაშ რადომ საქართველოს პირველ არხთან საუბრისას განმარტა წესები, რომელთა დაცვაც მგზავრებს მოუწევთ.

როგორც ანდრაშ რადო აცხადებს, აუცილებელი მოთხოვნაა, მგზავრებს ეკეთოთ პირბადე და ფრენის განმავლობაში არ მოიხსნან. მხოლოდ დამცავი ფარით მგზავრები რეისზე არ დაიშვებიან. მგზავრობისას პირბადე უნდა ეკეთოთ ორი წელზე მეტი ასაკის ბავშვებსაც. მგზავრებს ექნებათ უფლება, დასხდნენ ყველა თავისუფალ სკამზე.

„პირბადის გარეშე მგზავრობის გამონაკლისი შემთხვევებიც შეიძლება იყოს. ამ შემთხვევაში აუცილებელია, ოფიციალური დოკუმენტის წარდგენა და ეს უნდა იყოს მნიშვნელოვანი მიზეზი. მგზავრმა უნდა დაადასტუროს, რატომ ვერ ატარებს პირბადეს. ჩვენ ვცდილობთ, დავიცვათ ჩვენი თავი და მგზავრებიც. ეს ჩვენი საერთო პასუხისმგებლობაა, ვატაროთ პირბადე და დავიცვათ ერთმანეთი“, – განაცხადა ანდრაშ რადომ, რომლის თქმითაც, ფრენა უსაფრთხოა, რასაც სავენტილაციო სისტემა უზრუნველყოფს.

„ეკიპაჟის წევრებს ეკეთებათ პირბადეც და ხელთათმანებიც. მოხდება თვითმფრინავის დეზინფექცია. ჩვენს სავენტილაციო სისტემაში ჰაერი მუდმივად იცვლება, საათში ოცჯერ. ჰაერი თვითმფრინავში ძალიან სუფთაა. რაც შეეხება სხვადასხვა ქვეყნის წესებს, ისინი განსხვავებულია. ზოგიერთ ქვეყანაში არ არის აუცილებელი პირბადის ტარება ღია სივრცეში, მაგრამ შიდა სივრცეში აუცილებელია. ვურჩევდი მგზავრებს, გამომგზავრებამდე გაეცნონ კონკრეტული ქვეყნების წესებს, რათა მზად იყვნენ. ვფიქრობ, ქვეყნების უმეტესობა შეზღუდვებს ამსუბუქებს, არ მგონია, რომ საქართველოსთან შედარებით სხვა ქვეყნების უმრავლესობაში დიდად განსხვავებული წესები იყოს“, – განაცხადა კომპანიის წარმომადგენელმა.

გუშინ ცნობილი გახდა, რომ Wizz Air-ის ბაზა ქუთაისის აეროპორტში პირველი ივლისიდან ბრუნდება და პირდაპირ რეისებს ექვსი მიმართულებით შეასრულებს.