საინფორმაციო სააგენტო Bloomberg-ის ანალიტიკოსებმა გამოითვალეს, რომ ვაქცინაციის ამ ტემპების შენარჩუნების შემთხვევაში მთელი მსოფლიოს მოსახლეობის 75%-ის აცრას 7 წელი დასჭირდება. მხოლოდ ამის შემდეგ გახდება შესაძლებელი პანდემიით გამოწვეული შეზღუდვების მოხსნა.
ამერიკელი მეცნიერები, მათ შორის, ენტონი ფაუჩი, ვარაუდობენ, რომ ვირუსის გავრცელების დასამარცხებლად აუცილებელია მოსახლეობის 75%-ის აცრა.
მეცნიერები აცხადებენ, რომ მდიდარ ქვეყნებში ვაქცინაცია ბევრად სწრაფად მიმდინარეობს, ხოლო ღარიბ ქვეყნებში 75%-ის ვაქცინაციისთვის საერთო ჯამში 7 წელი იქნება აუცილებელი.
ისრაელში ვაქცინაციის ყველაზე მაღალი ტემპია მსოფლიოში. იქ მოსახლეობის 75% ორ თვეში იქნება აცრილი. აშშ-ში პროცენტულად მოსახლეობის იგივე რაოდენობა 2021 წლის შემოდგომისთვის იქნება აცრილი, ხოლო კანადას დღევანდელი ტემპებით ამ მაჩვენებლის მისაღწევად 10 წელი დასჭირდება.
ამასთანავე, ანალიტიკოსები აღნიშნავენ, რომ ეს ყველაფერი ვაქცინაციის ტემპებზე და ახალი ვაქცინების გამოყენებაზე იქნება დამოკიდებული. დღევანდელი მდგომარეობით, მსოფლიოში კოვიდვაქცინაცია მხოლოდ ქვეყნების მესამედში დაიწყო.
რამდენიმე დღის წინ გავრცელდა ინფორმაცია, რომ Goldman Sachs-ის შეფასებით, განვითარებული ქვეყნების მოსახლეობის 70% 2021 წლის შემოდგომისთვის კორონავირუსზე აცრილი იქნება.
pia.ge
კომენტარები