ორ თვეში საერთაშორისო ავიამიმოსვლაზე ყველა შეზღუდვის მოხსნა იგეგმება – ნათია თურნავა
საქართველოს ეკონომიკისა და მდგრადი განვითარების მინისტრის მოვალეობის შემსრულებელი ნათია თურნავა აცხადებს, რომ მომავალი წლის თებერვლიდან საერთაშორისო ფრენებზე ყველა შეზღუდვის მოხსნა იგეგმება. ამის შესახებ მან უწყების 2020 წლის საქმიანობის ანგარიშის წარდგენისას განაცხადა.
ამასთან, როგორც ნათია თურნავამ აღნიშნა, პანდემიის მიუხედავად წარმატებით გრძელდება და ერთი დღითაც არ შეფერხებულა სამინისტროს მიერ განხორციელებული ინფრასტრუქტურული პროექტები.
„დასრულების ფაზაშია ქუთაისისა და ბათუმის საერთაშორისო აეროპორტების გაფართოების პროგრამა. ეს განახლებული ინფრასტრუქტურა უმასპინძლებს სტუმრებს და ასევე მოემსახურება ჩვენს მოქალაქეებს“, – განაცხადა მინისტრმა.
საქართველოში რეგულარული საერთაშორისო ავიამიმოსვლა თითქმის 9 თვეა შეწყვეტილია. ამ ხნის განმავლობაში რეგულარული ფრენების აღდგენა რამდენჯერმე გადაიდო, სრულდებოდა მხოლოდ სპეცრეისები. მიმდინარე წლის ნოემბრიდან, მთავრობის დადგენილებით, რეგულარული ავიამიმოსვლა გამონაკლისის სახით მხოლოდ რამდენიმე მიმართულებით ხორციელდება.
კომენტარები