პოლიტიკასაქართველო

ფრანგული „ლეზ ექო“: „საქართველო ევროკავშირში, რატომაც არა?“

„საქართველო ევროკავშირში. და რატომაც არა?“ – ამ სახელწოდებით სტატიას გავლენიანი ფრანგული ფინანსური გამოცემა „ლეზ ექო“ (Les Echos) აქვეყნებს. სტატიის ავტორია ეკონომისტი სებასტიან კოშარი.

„მაშინ, როდესაც ევროკავშირმა ახლახან დაკარგა ერთი წევრი დასავლეთით, მეორე სახელმწიფომ, ამჯერად ევროპის აღმოსავლეთით, საჩქაროდ განაცხადა, რომ ის შეცვლის გაერთიანებულ სამეფოს ბრიუსელში. აი ის, რაც საქართველოს მოქმედმა პრეზიდენტმა და ყოფილმა ფრანგმა დიპლომატმა სალომე ზურაბიშვილმა განაცხადა“, – წერს გამოცემა.

პუბლიკაციის ავტორის თქმით, ზოგიერთს ამ წინადადებამ შესაძლოა ღიმილით მოჰგვაროს და ქედმაღლურად შეხედოს „პატარა საქართველოს“, თუმცა მისივე თქმით, „ეს ბევრი მიზეზის გამო შეცდომა იქნება“.

„პირველი მიზეზი არის ის რომ, პანდემიის ამ ტრაგიკულ დღეებში, როდესაც ევროკავშირი კვლავ დგას მიგრაციული კრიზისის წინაშე, რომელმაც ევროკავშირს დიდი ზიანი მიაყენა, ყველაზე სულელებისთვისაც კი ცხადია, რომ ჩვენი ცხოვრების ნაწილს ჩვენს საზღვრებზე მიმდინარე მოვლენები განსაზღვრავს. საქართველო კი ევროკავშირისთვის აღმოჩნდა იგივე, რასაც რუსეთი „უახლოეს საზღვარგარეთს“ უწოდებს. ამიტომ, ის, რაც საქართველოში ხდება, ჩვენ გვეხება და ჩვენ ეს უნდა გვაინტერესებდეს“, – წერს ავტორი.

პუბლიკაციაში აღნიშნულია, რომ „საქართველო, ერთი მხრივ, არის ხიდი ევროპას, რუსეთსა და ახლო აღმოსავლეთს შორის, ხოლო, მეორე მხრივ, საქართველოში პოლიტიკური და ეკონომიკური სიტუაცია უმჯობესდება“.

„საქართველო დემოკრატიის ერთგულია. გასულ თვეში მთავრობამ გამოაცხადა გადამწყვეტი რეფორმა ქვეყნის საარჩევნო სისტემაში. ამრიგად, ხელისუფლებამ შეასრულა „ქართული ოცნების“ მთავარი დაპირება. საარჩევნო რეფორმა მიღწეული იყო ოპოზიციურ პარტიებთან მრავალმხრივი მოლაპარაკებების შედეგად, რომელიც ევროკავშირისა და აშშ-ის შუამავლობით შედგა. საქართველოს პარლამენტში პროპორციული წარმომადგენლობა გაიზრდება და ქართველები ხმას, დაახლოებით ისეთივე სისტემით მისცემენ, როგორც ევროპელები“, – წერს გამოცემა.

სტატიაში ასევე ხაზგასმულია, რომ საქართველოს მოსახლეობის უდიდესი ნაწილი მტკიცედ უჭერს მხარს ევროკავშირთან დაახლოებას. ავტორი აღნიშნავს, რომ საქართველოს გაფორმებული აქვს ევროკავშირთან ასოცირების შეთანხმება, რაც თავისუფალი ვაჭრობის შეთანხმებას მოიცავს. ასევე საქართველო არის ევროპის საბჭოს თავმჯდომარე ქვეყანა.

„საქართველოში პოლიტიკური სტაბილურობასთან ერთად ეკონომიკაც მნიშვნელოვნად იზრდება, რაც გადამწყვეტია, განსაკუთრებით თუ გავიხსენებთ, რომ ევროკავშირი, უპირველეს ყოვლისა, საერთო ბაზარია. მაგალითად, მსოფლიო ბანკმა საქართველოსთან თანამშრომლობის 25-ე წლის აღნიშვნისას ხაზი გაუსვა ქვეყანაში ეკონომიკური და სოციალური სისტემის მნიშვნელოვან გაუმჯობესებას. განსაკუთრებით აღსანიშნავია სიღარიბის მაჩვენებლის შემცირება. ეს მაჩვენებელი 2006 წელს 32,5% იყო, ხოლო 2017 წელს – 16,3%“, – წერს ავტორი.

სტატიაში ასევე ნათქვამია, რომ „საქართველოს წინა მთავრობის დროს, 2008 წლის რუსეთ-საქართველოს ომმა შეახსენა ევროპას, რომ ევროკავშირის უსაფრთხოების და კეთილდღეობის დაცვა ევროკავშირის საზღვრებს გარეთ საზრიანი და აქტიური პოლიტიკის გატარებას მოითხოვს“.

„ეს გრძელვადიან პერიოდში ევროკავშირის გაფართოებას და საქართველოს გაწევრებას ნიშნავს? გამოწვევა დიდია და დიდწილად დამოკიდებულია ქართველებზე, თუმცა ევროკავშირის და საფრანგეთის ინტერესებშია მუდმივად მიადევნოს თვალი პოლიტიკურად სტაბილურ, დინამიური ეკონომიკის მქონე ქვეყანას, რომელსაც პროდასავლური მთავრობა და მოსახლეობა ჰყავს და რომელიც ევროპის საზღვარზე მდებარეობს. ეს არის ყველაზე ცოტა, რასაც გონივრული სამეზობლო პოლიტიკისგან უნდა ველოდოთ“, – ნათქვამია სტატიაში.

1tv.ge

კომენტარები

Tags

Related Articles

Leave a Reply

Your email address will not be published. Required fields are marked *

Back to top button
გაზიარება
Close