საქართველოს საპატრიარქო დეკანოზ გიორგი მამალაძის შეწყალებას უშუამდგომლებს

სრულიად საქართველოს კათოლიკოს-პატრიარქის მდივან-რეფერენტის მკვლელობის მცდელობისთვის მსჯავრდებული დეკანოზი გიორგი მამალაძე შესაძლოა პატიმრობიდან გათავისუფლდეს.

საქართველოს საპატრიარქომ ქვეყნის პრეზიდენტს დეკანოზ გიორგი მამალაძის შეწყალების თხოვნით მიმართა. მამალაძე მსჯავრდებულია სრულიად საქართველოს კათოლიკოს-პატრიარქის მდივან-რეფერენტის, შორენა თეთრუაშვილის მკვლელობის მცდელობისთვის. ამის შესახებ მეუფე პეტრემ (ცაავა) წმინდა სინოდის რიგგარეშე სხდომის დასრულების შემდეგ განაცხადა.

დეკანოზი 2017 წლის 10 თებერვალს თბილისის აეროპორტში დააკავეს, საიდანაც ის გერმანიაში უნდა გაფრენილიყო. მაშინ გერმანიაში მკურნალობდა საქართველოს კათოლიკოს-პატრიარქი ილია მეორე. გამოძიების მონაცემებით, მამალაძის ბარგში ნატრიუმის ციანიდი აღმოაჩინეს, ხოლო ბინაში – კუსტარულად დამზადებული ცეცხლსასროლი იარაღი და ექვსი ტყვია.

თბილისის საქალაქო სასამართლომ 2017 წლის სექტემბერში გიორგი მამალაძეს ცხრა წლით თავისუფლების აღკვეთა შეუფარდა. 2018 წლის თებერვალში სააპელაციო სასამართლომ განაჩენი ძალაში დატოვა. 2018 წლის აგვისტოში უზენაესმა სასამართლომ მამალაძის ადვოკატის სარჩელის განხილვაზე უარი განაცხადა და ამით პირველი ინსტანციების სასამართლოების გადაწყვეტილება ძალაში დატოვა.

sputnik-georgia.com

კომენტარები