ქართველი წყვილის ოქრო იტალიიდან

16-17 ოქტომბერს იტალიის ქალაქ მენტანაში გაიმართა საერთაშორისო ტურნირი ფიგურულ ციგურაობაში, რომელშიც საქართველოდან მარია კაზაკოვასა და გიორგი რევიას წყვილი მონაწილეობდა. მათ სპორტულ ცეკვებში შეჯიბრი ტრიუმფით დაასრულეს.

Mezzaluna Cup-ზე 7 სხვადასხვა ქვეყნის მოციგურავეებს შორის საქართველოს წარმომადგენლებმა 186.78 ქულით პირველი ადგილი და ოქროს მედლები დაიმსახურეს. მათ უშუალო კონკურენტს 15-ქულიანი უპირატესობით აჯობეს.

იტალიაში ქართველი წყვილი კიდევ ერთხელ წარდგა მაყურებლებისა და სპეციალისტების წინაშე თავიანთი ახალი ოლიმპიური პროგრამით.

ქართველი სპორტსმენებისათვის ამ სეზონზე ეს მეორე საერთაშორისო ტურნირი იყო ობერსდორფის შემდეგ.