რეგულარული ფრენები პირველი თებერვლიდან განახლდება – ნათია თურნავა

საქართველოს ეკონომიკისა და მდგრადი განვითარების მინისტრის, ნათია თურნავას ინფორმაციით, პირველი თებერვლიდან რეგულარულ ფრენებზე შეზღუდვა გაუქმდება და რეგულარული ფრენები აღდგება, – ამის შესახებ მან დღეს, 22 იანვარს საკოორდინაციო საბჭოს სხდომის დასრულების შემდეგ განაცხადა.

„პირველი თებერვლიდან, როგორც ადრეც ვსაუბრობდით, მივიჩნიეთ შესაძლებლად, რომ გავაუქმოთ რეგულარულ ფრენებზე შეზღუდვა, ანუ დავუშვათ რეგულარული ფრენები, ეს ნიშნავს, რომ ყველა ავიაკომპანია, ვინც დღემდე მოქმედებს საქართველოში, ასევე ახალი ავიაკომპანიები, ვინც გამოთქვამს საქართველოში შემოსვლის სურვილს, შეძლებენ რეგულარული ფრენების დაგეგმვას და შესრულებას გარკვეული სიხშირეებით, მაგრამ ეს ნოტამი, შეზღუდვა აღარ იმოქმედებს. რა თქმა უნდა, ეს მოხდება ყველა სამედიცინო პროტოკოლის და უსაფრთხოების წესების დაცვით. ახლა მსოფლიოში ბევრი ავიაკომპანია ამას ისედაც ახორციელებს, აქედან გამომდინარე, ეს არ იქნება რაიმე დამატებითი საფრთხის მომტანი“, – განაცხადა თურნავამ.

მისივე თქმით, მიმდინარეობს მსჯელობა, როგორ შემსუბუქდეს ქვეყანაში შემოსვლის რეჟიმი სხვადასხვა ვიზიტორებისთვის .

„ერთია, რომ ჩვენ ვუშვებთ რეგულარულ ფრენებს ყველა მიმართულებით და მეორე ის, რომ ვმუშაობთ და უახლოეს დღეებში გამოვაცხადებთ, რა სიახლეები იგეგმება საქართველოში უცხოელი ვიზიტორების შემოსვლასთან დაკავშირებით. შეგახსენებთ, რომ აქამდეც მოქმედებდა ბიზნეს ვიზიტორების პლატფორმა, გარკვეული ქვეყნების ჯგუფები, მათ შორის, ნაცვალგების ქვეყნები, საიდანაც უფრო მარტივი იყო შემოსვლა, მაგრამ ახლა ვითვალისწინებთ იმ გარემოებას, რომ მსოფლიოში თანდათან ტემპს იკრებს ვაქცინაცია, მათ შორის არიან ისეთი ქვეყნები, რომლებიც ჩვენთვის ტურისტულად მეტად მიმზიდველია, მაგალითად ისრაელი, სპარსეთის ყურის ქვეყნები და, რა თქმა უნდა, თავისთავად, ევროკავშირის ქვეყნები ყოველთვის მიმზიდველია ჩვენთვის ტურისტულად. ჩვენ ველოდებით, რომ უკვე უახლოეს პერიოდში, გაზაფხულის სეზონზე შევძლებთ, რომ ყველა წესის დაცვით ვუმასპინძლოთ უსაფრთხოდ უფრო დიდი რაოდენობით ტურისტებს. გამომდინარე აქედან, ეს არის ნამდვილად დადებითი სიახლე. ჩვენ შემდეგ კვირაში  შეხვედრა  გვექნება ტუროპერატორებთან, ტურისტულ კომპანიებთან, რათა ერთად ვიმსჯელოთ, როგორ მოემზადონ ეს კომპანიები, რომ ეს ახალი გარემოება ჩვენი ქვეყნის სასიკეთოდ გამოიყენონ“, – განაცხადა ნათია თურნავამ.