მსოფლიო ჭადრაკის ლეგენდა მაია ჩიბურდანიძე 60 წლის გახდა (ფილმი)

ლეგენდარული ქართველი მოჭადრაკე მაია ჩიბურდანიძე 60 წლის  გახდა. 

მან ჭადრაკის თამაში ქუთაისში დაიწყო. 13 წლის ასაკში მისი დებიუტი ბრაშოვში ქალთა საერთაშორისო ტურნირზე შედგა. 1976 წელს მაია ჩიბურდანიძემ საბჭოთა კავშირის ჩემპიონატი მოიგო, ერთი წლის შემდეგ კი საერთაშორისო დიდოსტატის წოდება მიენიჭა. 17 წლის ასაკში მაია ჩიბურდანიძე მსოფლიოს ყველაზე ახალგაზრდა ჩემპიონი გახდა (მისი ეს რეკორდი დღემდე ძალაშია – nostal.ge), 1978 წელს მან მოქმედი ჩემპიონი ნონა გაფრინდაშვილი დაამარცხა ანგარიშით 8,5:6,5.

ნანა ალექსანდრიასთან, ირინა ლევიტინასთან, ელენა ახმილოვსკაიასა და ნანა იოსელიანთან ჩატარებული პაექრობების შემდეგ მაია ჩიბურდანიძე მსოფლიოში უძლიერესი მოჭადრაკის გვირგვინს 14 წლის მანძილზე ინარჩუნებდა. მაიამ ჩემპიონის ტიტული 1991 წელს მანილაში, 21 წლის ჩინელ სიუ ჟუნთან პაექრობისას დათმო. 1997 წელს ის კონტინენტის ჩემპიონი გახდა.

მაია ჩიბურდანიძე საჭადრაკო ოლიმპიადების 15-გზის გამარჯვებულია. ეს შედეგი ქალთა შორის დაფიქსირებული საუკეთესო მაჩვენებელია. ის ყოველთვის პირველ დაფაზე თამაშობდა და ოთხჯერ მცირე ოქროს მედალიც მოიპოვა. საჭადრაკო ოლიმპიადებზე მაიას მიერ ჩატარებული 167 პარტიიდან მის ანგარიშზე 125,5 ქულაა.

2019 წლის 5 სექტემბერს თბილისში საზეიმოდ გაიხსნა მაია ჩიბურდანიძის სახელობის საჭადრაკო აკადემია, სადაც სწავლება მსოფლიოს ხუთგზის, ცხრაგზის ოლიმპიური ჩემპიონის და ოთხი საჭადრაკო ოსკარის მფლობელის მაია ჩიბურდანიძის საავტორო პროგრამით მიმდინარეობს.

ლეგენდა – მაია ჩიბურდანიძე დღეს თანამედროვე სივრცეში მის მიერ შექმნილი ჭადრაკის დანერგვაზე ოცნებობს.