გავიდნენ და არ დაბრუნებულან: რამდენი ადამიანი დაიკარგა საქართველოში 2019 წელს
დღეისათვის საქართველოში უგზო-უკვლოდ დაკარგულად მიიჩნევა 1000 ადამიანი, რომლებიც სხვადასხვა დროს დაიკარგნენ.
2019 წელს უგზო-უკვლოდ დაკარგულის სტატუსი მიანიჭეს 195 ადამიანს, ნათქვამია შსს-ს მასალებში.
უწყების მონაცემებით, 195 ადამიანიდან იპოვეს 133, აქედან ათი მათგანი გარდაცვლილი იყო.
ნაპოვნი ადამიანებიდან ოთხი იყი ბელგიის მოქალაქე, ორი – საუდის არაბეთის, ასევე აზერბაიჯანის, ყაზახეთის, რუსეთის და იორდანიის თითო მოქალაქე. ყველა მათგანი ცოცხალია.
უგზო-უკვლოდ დაკარგულთა შორის პოლიციამ ვერ იპოვა 16 წლამდე ასაკის შვიდი ბავშვი. გარდა ამისა, სამართალდამცველები ეძებენ:
| უგზო-უკვლოდ დაკარგულები | ასაკი |
| 12 ადამიანი | 61 წელს ზემოდ |
| 5 ადამიანი | 17-იდან 24 წლამდე |
| 25 ადამიანი | 25-იდან 44 წლამდე |
| 13 ადამიანი | 45-იდან 60 წლამდე |
შსს-ს მონაცემებით, სულ 1973 წლიდან 2020 წლის პირველ იანვრამდე საქართველოში უგზო-უკვლოდ დაიკარგა დაახლოებით 6000 ადამიანი, ნაპოვნია დაახლოებით 5000.
დღეისათვის საქართველოში ათასი ადამიანი იძებნება: 208 ქალი და 792 მამაკაცი, რომლებიც სხვადასხვა დროს დაიკარგნენ. აღსანიშნავია, რომ უგზო-უკვლოდ დაკარგული ყოველი მესამე დედაქალაქში ცხოვრობდა.
კომენტარები