კუნძულ კრეტაზე ძლიერი მიწისძვრა მოხდა, თებეში მომხდარი მიწისძვრის ბიძგები კი ათენშიც იგრძნეს

საბერძნეთშის კუნძულ კრეტაზე დღეს 5,2 მაგნიტუდის მიწისძვრა მოხდა. ამის შესახებ ბერძნული მედია იტყობინება.

ძლიერი მიწისქვეშა ბიძგები ადგილობრივი დროით 7:13 საათზე დაფიქსირდა. ეპიცენტრი ხმელთაშუა ზღვაში, კუნძულ კრეტაზე მდებარე ქალაქ ზაკროსიდან 30 კილომეტრში მდებარეობდა.

ბოლო 24 საათში კრეტაზე 3+ მაგნიტუდის კიდევ 3 მიწისძვრა და 2+ მაგნიტუდის 7 მიწისძვრა მოხდა, აგრეთვე 5 მცირე, 2,0 მაგნიტუდაზე ნაკლები მიწისქვეშა ბიძგი დაფიქსირდა, რომლებსაც, ჩვეულებრივ, ადამიანები ვერ გრძნობენ.

დღეს, 3 სექტემბერს 3,9 მაგნიტუდის მიწისძვრა მოხდა ქალაქ თებეში (ათენიდან ჩრდილო-დასავლეთით, 52 კმ-ის დაშორებით). მიწისძვრა 11:31 სთ-ზე მოხდა, კერა თებედან ჩრდილო-აღმოსავლეთით, 5 კმ-ის დაშორებით იყო, ფოკალური სიღრმე კი 5 კმ-ს უდრიდა. სეისმური ტალღა მთელ ატიკაში გავრცელდა, რაც დედაქალაქის მაცხოვრებლებმაც კარგად იგრძნეს.

ევროპულ-ხმელთაშუაზღვის სეისმურმა ინსტიტუტმა გაავრცელა ინფორმაცია, რომ თებეში მომხდარი მიწისძვრის სიმძლავრე  რიხტერის სკალით 4,1 ბალი იყო.

ნინო ბაჯელიძე