„ბიბლიური წარღვნა“ – ორი ბერძნული საკურორტო კუნძული თითქმის წყალქვეშ მოექცა (ვიდეო)
მიმდინარე კვირის დასაწყისში საბერძნეთის რამდენიმე კუნძულს „ბიბლიური მასშტაბის“ სტიქია დაატყდა თავს.
ცნობილი ადამიანებისა და მილიარდერების საყვარელი დასასვენებელი ადგილები, კუნძულები – პაროსი და მიკონოსი ძლიერი წვიმის შედეგად, პრაქტიკულად, წყლით დაიფარა, გზები ტალახიან მძვინვარე მდინარეებად იქცა, დახურულია სკოლები და საბავშვო ბაღები. ყველა მანქანას აეკრძალა მოძრაობა, გარდა სასწრაფო დახმარებისა. ამის შესახებ Protothema იუწყება.
პაროსის მერის, კოსტას ბიზასის განცხადებით, სტიქია იმდენად სწრაფად მოხდა, რომ გზების გასაწმენდად საჭირო ტექნიკის მობილიზება ვერ მოასწრეს.
„გზები დაზიანებულია და ქუჩების გასაწმენდად გვჭირდება დახმარება ტექნიკით. ეს კატასტროფა ორ საათში მოხდა“, – განაცხადა კოსტას ბიზასმა.
კუნძულზე ერთი თვით საგანგებო მდგომარეობა გამოცხადდა.
Μεγάλες ζημιές στην Πάρο⚡⚡⚡⚡⛈️⛈️⛈️⛈️pic.twitter.com/ydTimNFWQD
— ΓΙΩΡΓΟΣ (@GIORGOS_511972) April 1, 2025
პაროსზე სტიქიის შედეგად ქუჩები ტალახითაა დაფარული. მძვინვარე ნიაღვრებმა ავტომანქანები ზღვაში ჩაიტანა, სახლები და მაღაზიები დაიტბორა. ყველაზე დიდი პრობლემები იყო ნაუსაში, სადაც წყლის დიდმა ნაკადებმა მოაჯირები მოგლიჯა, ხიდზე ავტომობილები დაბლოკა, ავტომობილების ნაწილი ზღვაში გადაყარა ველოსიპედებსა და ნაგვის კონტეინერებთან ერთად.
ამერიკული თანამგზავრებიდან Landsat-8 და Sentinel-2 2025 წლის პირველ აპრილს გადაღებულ ფოტოებზე ჩანს ზღვაში ის ადგილები, სადაც მოგროვდა მთელი ჭუჭყი და ნაგავი ნაოსიდან, პაროსიდან და გლიფადეს-ცუკალიიდან კუნძულის აღმოსავლეთით.
საგანგებო მდგომარეობა გამოცხადდა მიკონოსზეც, სადაც ძლიერი წვიმების გამო წარმოქმნილმა ნიაღვრებმა კუნძულის დასავლეთ სანაპიროზე მდებარე ქალაქ ხორის (Χώρα) ქუჩები დატბორა და ნგრევა და პრობლემები გამოიწვია. წყალმა სკამები და მაგიდები ზღვაში ჩაიტანა, ხოლო მანქანები – რიყეზე.
უამინდობამ პრობლემები შექმნა კრეტაზე, განსაკუთრებით ხანიაში, აგრეთვე, როდოსზე, სადაც გუშინ ძალიან ძლიერი ქარი ქროდა. როდინის რაიონში კი ტორნადო წარმოიქმნა, რასაც შენობების ფანჯრების მსხვრევა, აივნებიდან ყვავილების ქოთნების ცვენა და უამრავი ავტომანქანის დაზიანება მოჰყვა. საბედნიეროდ, ადამიანების დაშავების შემთხვევებზე ინფორმაცია არ გავრცელებულა.
დღეს დილით ატიკამ წვიმიან ამინდში „გაიღვიძა“, თუმცა ათენში და მთლიანად ატიკაში უამინდობა ისეთი ინტენსიური არ არის, როგორიც გუშინ და გუშინწინ კუნძულებზე იყო.
ქვეყნის ეროვნულმა მეტეოროლოგიურმა სამსახურმა ამინდის განახლებული საგანგებო ბიულეტენი გამოაქვეყნა, რომელშიც ნათქვამია, რომ უამინდობა უახლოეს დღეებშიც შენარჩუნდება, მოსალოდნელია ძლიერი წვიმა და ელჭექი, ზოგან სეტყვა, დროდადრო გაძლიერდება ქარი.
ნინო ხოშტარია
კომენტარები