დედამიწას ბოლო 20 წლის განმავლობაში ყველაზე ძლიერი მზის ქარიშხალი დაატყდა თავს
ოკეანური და ატმოსფერული კვლევების აშშ-ის ეროვნული სამმართველოს ცნობით, დედამიწას 2003 წლის შემდეგ ყველაზე ძლიერი მზის ქარიშხალი დაატყდა თავს. გეომაგნიტური შტორმები შესაძლოა მომავალ კვირამდეც გაგრძელდეს. ამის შესახებ ფინეთის ეროვნული საზოგადოებრივი სამაუწყებლო კომპანია იუწყება.
მზის ქარიშხლის ნაკადი დედამიწის მაგნიტურ ველს არღვევს და შტორმებს იწვევს. მაგნიტური ქარიშხალი შაბათს საღამოს მსოფლიოს რამდენიმე ნაწილში, მათ შორის, ესტონეთშიც იყო შესამჩნევი.
გეომაგნიტურმა ქარიშხალმა შეიძლება გამოიწვიოს პერიოდული შეფერხებები, მაგალითად, თანამგზავრის ადგილმდებარეობის გარკვევის დროს, უკიდურეს შემთხვევაში კი – ელექტროენერგიის გათიშვა.
ძლიერმა მზის შტორმებმა კაცობრიობის ისტორიაში რამდენჯერმე გამოიყვანა მწყობრიდან ელექტროსისტემები. 1989 წლის გაზაფხულზე საკმაოდ ძლიერმა გეომაგნიტურმა ქარიშხალმა კანადაში ელექტროენერგიის ცხრასაათიანი გათიშვა გამოიწვია, 2003 წლის შემოდგომაზე კი მზის ქარიშხალმა შვედეთსა (მალმეში) და სამხრეთ აფრიკაში ელექტროქსელები დააზიანა.
კომენტარები