„ალი ავარდა! ასეთი სასწაული ჩემს ცხოვრებაში არ მომხდარა! ჯერ თვითონაც ვერ გავრკვეულვარ, ეს რა იყო…“ – რა შეემთხვა პოეტ ტარიელ ხარხელაურს ბაგრატის ტაძარში
ტარიელ ხარხელაური სასწაულის მომსწრე გახდა. ქუთაისის ღვთისმშობლის მიძინების სახელობის ტაძარში – იგივე ბაგრატის ტაძარში პოეტის ხელში სანთლები თავისით აინთო!
ამ სასწაულის შესახებ საზოგადოებას ფეისბუქის მეშვეობით იზა ვეფხვაძემ ამცნო.
ცეცხლის გადმოსვლის შესახებ პოეტი „პრაიმტაიმს“ უყვება და თავის პირველ ემოციას უზიარებს.
ტარიელ ხარხელაური: დღეს [17 ნოემბერს] ქუთაისში ქართულ-ამერიკული სკოლის გახსნაზე გახლდით სტუმრად მიწვეული. ბავშვებთან შეხვედრა მქონდა. შემდეგ, მეუღლესთან ერთად, ბაგრატის ტაძარი მოვილოცე. მივედი ჯვარცმასთან ხელში ხუთი სანთლით. ვდგავარ მაცხოვრის ჯვარცმის წინ და უფალს შევთხოვ: უამრავჯერ გიპატიებია შეურაცხყოფა და იქნებ ახლაც აპატიო ამ ცოდვილ სამყაროს-მეთქი…
უცებ, ამ დროს, ხელში სითბო ვიგრძენი; ხუთ სანთელში აქედან-იქიდან ორ-ორი აინთო, შუა სანთელი არ აინთო! სანთლებთან ახლოს არ ვმდგარვარ. რა ახლოსაც არ უნდა ვმდგარიყავი, ასე ერთდროულად სანთლები ვერ აინთებოდა! ალი ავარდა!
ეს სასწაული რამდენიმე საათის წინ მოხდა და ახლაც გაოგნებული ვარ. გულს ბაგა-ბუგი გაუდის! ასეთი სასწაული ჩემს ცხოვრებაში არ მომხდარა. თვითონ მიკვირდა, სხვა რომ ჰყვებოდა, ან გავიგებდი. დღეს საკუთარი თვალით ვიხილე…
მარინა ხარხელაური: რომ შევხედე, გაფითრებული სახე ჰქონდა, სანთლები თავისით აინთოო, მითხრა და სულ ერთიანად აკანკალებდა. გაოგნებული იყო…
ტარიელ ხარხელაური: საკუთარი თავისთვის არასდროს მიმიმართავს უფლისთვის. სამყაროსთვის და ქვეყნისთვის შევთხოვ ხოლმე. მაგრამ დღეს რაც მოხდა, მსგავსი რამ არასდროს მომხდარა. გაოცებულიც ვარ და დათრგუნულიც, რადგან მე ამის მოლოდინი არ მქონია. ცეცხლის გადმოსვლის სასწაულის მომსწრე გავხდი!
მადლობა უფალს, ამის ღირსი რომ გამხადა!.. ჯერ თვითონაც ვერ გავრკვეულვარ, ეს რა იყო, ნიშანი თუ რა… გულს ბაგა-ბუგი გაუდის.
თავიდანვე ვიცოდი, რომ უფალი ჩემთან იყო, მაგრამ მთლად ასე ახლოს თუ იქნებოდა, ვერ ვიფიქრებდი…
კომენტარები