საფრანგეთის სამხრეთ-დასავლეთში, სენ-ჟან-დე-ლიუზში (Saint-Jean-de-Luz, დეპარტამენტი – Pyrénées-Atlantiques), ერთ-ერთ კოლეჯში მოსწავლემ გაკვეთილის დროს მასწავლებელ ქალს დანა დაარტყა. მიყენებული ჭრილობისგან მასწავლებელი გარდაიცვალა.
შემთხვევა ოთხშაბათს, 22 თებერვალს მოხდა წმინდა თომა აკვინელის კათოლიკურ ლიცეუმში. 53 წლის ესპანური ენის მასწავლებელი გაკვეთილს ატარებდა, როდესაც 16 წლის მოსწავლე ბიჭი მასთან მივიდა და, თვითმხილველების თქმით, „სიტყვის უთქმელად მკერდში დანა ჩასცა“. სასწრაფოს მოსვლის დროს ქალი ცოცხალი იყო, თუმცა ექიმებმა მისი გადარჩენა ვეღარ შეძლეს.
16 წლის მოზარდი დააკავეს, იგი პატიმრობაში იმყოფება. დანაშაულის მოტივი ჯერჯერობით უცნობია.
როგორც ლიცეუმში ამბობენ, ესპანურის მასწავლებელი ძალიან კარგი, უკონფლიქტო ქალი იყო და ყველას უყვარდა. მომხდარ ტრაგედიას არაფერი მოასწავებდა, რადგან სკოლა თავისი მშვიდი ატმოსფეროთი გამოირჩევა.
გამომძიებლების ვარაუდით, მკვლელობა ტერაქტი არ ყოფილა. ვრცელდება ინფორმაცია, რომ მოზარდს შესაძლოა ფსიქიკური პრობლემები ჰქონდეს. Franceinfo-ს ცნობით, მან თქვა, რომ „შეპყრობილი“ იყო და ხმები ესმოდა.
მიმდინარეობს გამოძიება.
2020 წელს ვალ დ’უაზში სამუელ პატის მკვლელობის შემდეგ ეს პირველი მსგავსი შემთხვევაა საფრანგეთში.
ნინო ხოშტარია
მსგავს თემაზე: პარიზის გარეუბანში მასწავლებელს თავი მოჰკვეთეს – სავარაუდო მკვლელი 18 წლის ჩეჩენია
პარიზის გარეუბანში მასწავლებელს თავი მოჰკვეთეს – სავარაუდო მკვლელი 18 წლის ჩეჩენია
საფრანგეთში სკოლის მასწავლებლის თავის მოკვეთის საქმეზე 9 ადამიანი დააკავეს
ფრანგი მასწავლებლის მკვლელი ჩეჩნეთის სოფელში დაასაფლავეს (ვიდეო)
კომენტარები