fbpx
მედიცინაჯანმრთელობა

კოვიდ-19-ის სახლის პირობებში სამკურნალოდ პირველ პრეპარატს ავტორიზაცია მიენიჭა

პრეპარატ პაქსლოვიდს, ამერიკული ფარმაცევტული კომპანია Pfizer-ის მიერ წარმოებულ COVID-19-ის საწინააღმდეგო ანტივირუსულ აბებს, აშშ-ის სურსათისა და წამლის უსაფრთხოების რეგულირების სააგენტომ (FDA) გადაუდებელი გამოყენების ავტორიზაცია მიანიჭა 12 წელზე უფროსი იმ ადამიანთათვის, რომელთაც COVID-19-ის გამწვავების მაღალი რისკი აქვთ. შედეგად, ეს პრეპარატი პირველია, რომელიც კორონავირუსის სახლის პირობებში მკურნალობისათვის არის განკუთვნილი. ამის შესახებ Associated Press-ი წერს.

კლინიკური ცდების შედეგად გაირკვა, რომ პაქსლოვიდის ეფექტიანობა  90%-ს უდრის მაღალი რისკის მქონე პაციენტებში ჰოსპიტალიზაციისა და სიკვდილის პრევენციის თვალსაზრისით. უახლესი ლაბორატორიული კვლევების მონაცემები აჩვენებს, რომ პრეპარატი ეფექტიანია „ომირკონით“ ინფიცირების შემთხვევაშიც.

კლინიკურ კვლევაში, რომელიც 30 დღის განმავლობაში მიმდინარეობდა, 2250 პაციენტი მონაწილეობდა. კვლევამ აჩვენა, რომ „პაქსლოვიდის“ მიღება ჰოსპიტალიზაციის და სიკვდილის შემთხვევებს 89%-ით ამცირებს კოვიდ-19-ით დაავადებული იმ ადამიანების შემთხვევაში, რომელთა დაავადება მსუბუქად და საშუალო სიმძიმის ფორმით მიმდინარეობს სიმპტომების გამოვლენიდან 3 დღის განმავლობაში. იმ პაციენტებიდან, რომლებიც პაქსლოვიდს იღებდნენ, საავადმყოფოში გადაყვანა მხოლოდ 1%-ს დასჭირდა, გარდაცვალებით კი არავინ გარდაცვლილა, თუმცა პრეპარატი ეფექტიანია მხოლოდ იმ შემთხვევაში, თუ პაციენტი მის მიღებას კოვიდ-19-ის სიმპტომების გამოვლენიდან არაუგვიანეს 5 დღეში დაიწყებს.

Pfizer-ის განცხადებით, კომპანია მზადაა, აშშ-ში დაუყოვნებლივ დაიწყოს პრეპარატის მიწოდება, 2020 წლიდან კი წარმოება 120 მილიონ დოზამდე გაზარდოს.

FDA-ს ცნობით, პრეპარატი პაქსლოვიდი რეცეპტით გაიცემა და მის მისაღებად პაციენტს COVID-19-ის ტესტის დადებითი პასუხი სჭირდება. მკურნალობის კურსი 5-დღიანია და პაქსლოვიდს გარდა პაციენტი იღებს, აგრეთვე, მეორე შედარებით ძველ ანტივირუსულ პრეპარატს – რიტონავირს. ამ პრეპარატით მკურნალობის დაწყება უნდა მოხდეს დიაგნოზის დასმიდან რაც შეიძლება მალე და სიმპტომების გამოვლენიდან არაუგვიანეს ხუთ დღისა. აბების მიღება საჭიროა ყოველ 12 საათში ერთხელ, ხუთი დღის განმავლობაში. მკურნალობის ერთი კურსი 530 აშშ დოლარი ჯდება.

Pfizer-ის განცხადებით, სრული ავტორიზაციის მოთხოვნით FDA-ს 2022 წელს მიმართავენ.

აშშ-ის ხელისუფლებამ კომპანიას პაქსლოვიდის 10 მილიონი ადამიანის სამკურნალოდ საჭირო რაოდენობა უკვე შეუკვეთა.

AP-ის ცნობით, სურსათისა და წამლის რეგულირების სააგენტოს, სავარაუდოდ, უახლოეს მომავალში კომპანია Merck-იც მიმართავს მის მიერ შემუშავებული ექსპერიმენტული მედიკამენტის, მოლნუპირავირის ავტორიზაციისთვის.

შეგახსენებთ, რომ დიდი ბრიტანეთის მარეგულირებელმა „მერკის“ კოვიდ-19-ის სამკურნალო ანტივირუსულ აბ მოლნუპირავირს ნოემბერში პირობითი ავტორიზაცია მიანიჭა. მოლნუპირავირი ასევე გამოიყენება პერორარლურად კოვიდ-19-ის მსუბუქი ან საშუალო სიმძიმის სიმპტომების მქონე პაციენტების სამკურნალოდ სახლში, სამედიცინო პერსონალის დაუხმარებლად.

„მერკი“ აცხადებს, რომ მოლნუპირავირი ჰოსპიტალიზაციის და სიკვდილიანობის მაჩვენებელს ანახევრებს.

ნინო ხოშტარია 

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close