რეალური რისკები: ლონდონი შესაძლოა სხვა დედაქალაქით ჩანაცვლდეს

დიდი ბრიტანეთის დედაქალაქი ლონდონი შესაძლოა სხვა ქალაქით ჩანაცვლდეს, ვინაიდან კლიმატური ცვლილებები და ზღვის დონის აწევა მას დატბორვით ემუქრება, იუწყება Daily Express-ი ექსპერტებზე დაყრდნობით.

მეცნიერების პროგნოზით, მომავალში ლონდონი კიდევ უფრო ექსტრემალურ კლიმატურ პირობებსა და ძლიერ წყალდიდობებს შეეჯახება, თუ გლობალური დათბობა არ შეჩერდება.

კლიმატის საკონსულტაციო ჯგუფის ხელმძღვანელის, დევიდ კინგის თქმით, ზღვის დონის აწევა განსაკუთრებით ლონდონს, ჰალსა და ბრისტოლს ემუქრება.

მიუხედავად იმისა, რომ შეფასებები სხვადასხვაგვარია, ზღვის გლობალური დონე შესაძლოა 70 მეტრით აიწიოს, თუ პლანეტის ყველა მყინვარი გადნება. ასეთ შემთხვევაში, აშშ-ის გეოლოგიური სამსახურის (USGS) მონაცემებით, პლანეტის ყველა სანაპირო ქალაქი ჩაიძირება.

„ჩვენ კუნძულოვანი სახელმწიფო ვართ. ეს კი იმას ნიშნავს, რომ ყველაზე დიდი პრობლემა, რომელსაც კლიმატური ცვლილების გამო ვაწყდებით, ზღვის დონის აწევა და ზღვაზე შტორმებია. ზღვაზე შტორმები კი კუნძულოვანი სახელმწიფოს შემთხვევაში ნიშნავს შტორმებს ქვეყნის შიგნით. ამიტომ საბოლოოდ ჩვენს სანაპირო რაიონებს იმავდროულად ადიდებული მდინარეებიც შეუტევს“, − განმარტა მან.

შესაბამისად, სპეციალისტს მიაჩნია, რომ ლონდონი, რომელიც მდინარე ტემზაზეა გაშენებული, განსაკუთრებული რისკის ქვეშაა.