„საუკუნის ქორწილში“ ნეფის – რომანოვების მემკვიდრის, გიორგი რომანოვის მეჯვარე დავით ბაგრატიონი იყო
nostal.ge-ს მკითხველს უკვე გაცნობეთ, რომ გიორგი ბაგრატიონ-მუხრანელის შვილთაშვილმა, რუსული სამეფო გვარის, რომანოვების მემკვიდრე, გიორგი რომანოვი სანკტ-პეტერბურგში იტალიელ ქალბატონზე რებეკა ბეტარინიზე დაქორწინდა. ახლა კი ფეისბუქზე „საქართველოს სამეფო სახლის“ მიერ გავრცელებული ინფორმაციიდან ირკვევა,რომ გიორგი რომანოვის მეჯვარე საქართველოს სამეფო სახლის წარმომადგენელი, დავით ბაგრატიონი იყო.
„საუკუნის ქორწილი“ – ასე უწოდეს რუსეთში, მონარქისტულ წრეებსა და უცხოურ მედიაში რომანოვის ჯვრისწერას, რადგან 1917 წლის ოქტომბრის რევოლუციის შემდეგ ეს რუსეთის საიმპერატორო დინასტიის წარმომადგენელთა პირველი ქორწილია, რომელიც ქვეყნის ტერიტორიაზე ასე გრანდიოზულად აღინიშნა. ქორწილში 20-ზე მეტი სამეფო ოჯახი იყო მიწვეული, მათ შორის, საქართველოს სამეფო ოჯახიც. ცერემონიალს 1500-ზე მეტი ადამიანი დაესწრო.
„საქართველოს სამეფო სახლის მეთაური, უფლისწული დავით ბაგრატიონ მუხრანბატონი მეუღლესთან, პრინცესა ირინასთან ერთად სანკტ-პეტერბურგში საიმპერატორო ქორწილს დაესწრო.
დავით ბაგრატიონი გიორგი რომანოვის ბიძაშვილია. დავითის პაპა, ირაკლი ბაგრატიონ მუხრანბატონი და გიორგის ბებია, ლეონიდა ბაგრატიონ მუხრანელი და-ძმა იყვნენ.
რუსეთის საიმპერატორო ტახტის მემკვიდრის ქორწილის აღსანიშნავად ღონისძიებები 3 დღეს გაგრძელდა.
30 სექტემბერი, დღე პირველი: წინასაქორწილო წვეულება კოქტეილის საღამო (welcome coctail) ვლადიმირის სასახლეში, რომელიც გიორგი რომანოვის დიდ პაპას ეკუთვნოდა.
მიწვეულ სტუმრებს შორის იყვნენ: ბულგარეთის მეფე სიმეონ II და ბულგარეთის დედოფალი მარგარეტა; იტალიის ტახტის მემკვიდრე ემანუელ ფილიბერტო, ვენეციის პრინცი; ავღანეთის პრინცესა ნოალი; პრინცი იოაჰიმ მიურატი; პორტუგალიის სამეფო ტახტის მემკვიდრე ბრაგანცას ჰერცოგი დომ დუარტე პიო; ალბანეთის ტახტის მემკვიდრე ლეკა II; ეგვიპტის მეფე საუდ და სხვანი“, – წერია „საქართველოს სამეფო სახლის“ მიერ გავრცელებულ ინფორმაციაში.
კომენტარები