ნინო სალუქვაძე ერთადერთი ქალი სპორტსმენია ისტორიაში, რომელიც ოლიმპიურ თამაშებზე მეცხრედ იასპარეზებს

ზაფხულის XXXII ოლიმპიური თამაშები იაპონიის დედაქალაქ ტოკიოში გაიხსნა. ოლიმპიადაში 205-მდე ქვეყნის დაახლოებით 11 ათასი სპორტსმენი მონაწილეობს, საქართველოს დელეგაცია 34 სპორტსმენითაა წარმოდგენილი.

მსოფლიოს ერთ-ერთი წამყვანი მედიასაშუალება CNN-ი ქართველ მსროლელზე წერს და ხაზს უსვამს, რომ ნინო სალუქვაძე ერთადერთი ქალი სპორტსმენია ისტორიაში, რომელიც ოლიმპიურ თამაშებზე მეცხრედ იასპარეზებს.

ქართველ მსროლელს სამი ოლიმპიური მედალი აქვს მოპოვებული:

ოქრო – სეული (1988 წელი)

ვერცხლი – სეული (1988 წელი)

ბრინჯაო – პეკინი (2008 წელი)

ამასთან, 52 წლის რეკორდსმენი ჩვენი გუნდის მედროშე მეორედ გახდა. ტოკიოს ოლიმპიადის გახსნის ცერემონიალზე საქართველოს ოლიმპიური დელეგაციას მეორე მედროშეც ჰყავდა – ოლიმპიური ჩემპიონი, ძალოსანი ლაშა ტალახაძე.

საქართველოს ოლიმპიური გუნდის ერთ-ერთი ლიდერი მიიჩნევს, რომ მისთვის რიგით მეცხრე ოლიმპიადა ალბათ ყველაზე რთული იქნება.

შეგახსენებთ, რომ იაპონიის მთავრობის მიერ გამოცხადებული საგანგებო მდგომარეობის გამო ოლიმპიური ასპარეზობები უმაყურებლოდ ჩატარდება.