fbpx
პოლიტიკასაქართველო

მომავალ პარლამენტში „ქართული ოცნება“ 90 დეპუტატით იქნება წარმოდგენილი

მომავალ პარლამენტში „ქართული ოცნება“ 90 დეპუტატით იქნება წარმოდგენილი, „ნაცმოძრაობა“ – 36 მანდატით, „ევროპული საქართველო“ – ხუთი, „ლელო“, „სტრატეგია აღმაშენებელი“, „პატრიოტთა ალიანსი“ და „გირჩი“ – 4-4, „მოქალაქეები“ – ორი, „ლეიბორისტული პარტია“ – ერთი მანდატით, – ამის შესახებ „ქართული ოცნება – დემოკრატიული საქართველოს“ აღმასრულებელმა მდივანმა, ირაკლი კობახიძემ განაცხადა.

კობახიძემ განცხადება საპარლამენტო არჩევნების მეორე ტურის კენჭისყრის პროცესის დასრულების შემდეგ გააკეთა.

„როგორც მოგეხსენებათ, 2016 წლის ანალოგიურად, სამწუხაროდ, ოპოზიციამ ამჯერადაც უარი თქვა მეორე ტურში მონაწილეობაზე, თუმცა, მიუხედავად ოპოზიციის საბოტაჟისა, ნახევარ მილიონზე მეტმა ჩვენმა თანამოქალაქემ დღეს გამოავლინა მაღალი სამოქალაქო პასუხისმგებლობა და გამოცხადდა საარჩევნო უბნებზე.

ჩვენ გვაქვს კენჭისყრის წინასწარი მონაცემები. როგორც მოსალოდნელი იყო, „ქართული ოცნების“ 17-ვე კანდიდატმა მოიპოვა სადეპუტატო მანდატები.

შესაბამისად, მომავალ პარლამენტში „ქართული ოცნება“ 90 დეპუტატით იქნება წარმოდგენილი.

ოპოზიციურ პარტიებსა და ბლოკებს შორის კი მანდატები შემდეგი სახით განაწილდება: „ერთიანი ნაციონალური მოძრაობა“ – 36 მანდატი;  „ევროპული საქართველო“ – ხუთი მანდატი;  „ლელო“, „სტრატეგია აღმაშენებელი“, „პატრიოტთა ალიანსი“ და „გირჩი“ – 4-4 მანდატი; მოქალაქეები – ორი მანდატი; „ლეიბორისტული პარტია“ – ერთი მანდატი.

შედეგად, ჩვენი საერთაშორისო პარტნიორების ძალისხმევით შეთანხმებული საარჩევნო სისტემის საფუძველზე, ჩამოყალიბდა მრავალპარტიული პარლამენტი, სადაც წარმოდგენილია ცხრა პოლიტიკური სუბიექტი და სადაც მმართველი პარტია არ ფლობს ჭარბ უმრავლესობას.

ეს არის უმნიშვნელოვანესი წინგადადგმული ნაბიჯი ქართული დემოკრატიის განვითარების გზაზე“, – განაცხადა კობახიძემ.

მისი თქმით, ახალი, მრავალპარტიული პარლამენტი გახდება საუკეთესო პლატფორმა პოლიტიკური დებატებისთვის ქვეყნის განვითარების უმნიშვნელოვანეს საკითხებზე.

„მომავალი პარლამენტი უნდა გახდეს უმნიშვნელოვანესი დემოკრატიული ინსტრუმენტი იმ ეკონომიკურ და სოციალურ გამოწვევებთან გასამკლავებლად, რომლებიც ჩვენს ქვეყანაში გლობალურმა პანდემიამ შექმნა.

თითოეულ ჩვენს მოქალაქეს მინდა მივულოცო საპარლამენტო არჩევნების წარმატებით დასრულება.

რა თქმა უნდა, განსაკუთრებულ მადლობას ვუხდით ჩვენს მხარდამჭერებს გამოცხადებული ნდობისთვის. ამ ნდობის გასამართლებლად „ქართული ოცნება“ ყველაფერს გააკეთებს. მოგვიანებით გაგაცნობთ მეორე ტურის დაზუსტებულ შედეგებს“, – განაცხადა ირაკლი კობახიძემ.

ცენტრალური საარჩევნო კომისიიის ინფორმაციით, ამომრჩევლის აქტივობამ 2020 წლის საპარლამენტო არჩევნების მეორე ტურში 26.29% შეადგინა. დღის განმავლობაში საარჩევნო უბნებზე 562 664 ამომრჩეველი მივიდა. კობახიძის ინფორმაციით, ოპოზიციის მიერ გამოცხადებული ბოიკოტის მიუხედვად, მათმა კანდიდატებმა მეორე ტურში 50 ათასი ხმა მიიღეს.

ყველაზე მაღალი აქტივობა კვლავ აჭარის რეგიონში დაფიქსირდა – 39,29%, ხოლო ყველაზე დაბალი – ნაძალადევში – 20.04%.

ცესკოს მონაცემების თანახმად, რეგიონების მიხედვით ამომრჩევლის აქტივობა ასეთი იყო: აჭარა – 30.29%, თბილისი – 21.9%, იმერეთი – 27.6%, კახეთი – 33.7%, მცხეთა-მთიანეთი – 32.5%, სამეგრელო-ზემო სვანეთი – 28.6%, ქვემო ქართლი – 29.2%, შიდა ქართლი – 33.2%.

წყარო: 1tv.ge

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close