საქართველოს 488 მილიონერი ჰყავს

საქართველოს 488 მილიონერი ჰყავს. შემოსავლების სამსახურის მიერ „ბიზნესპარტნიორისთვის“ მიწოდებული ინფორმაციის თანახმად, 2019 წელს ერთ მილიონ ლარზე მეტი შემოსავალი სწორედ 488-მა პირმა მიიღო. მათ მიერ ერთ წელში გამომუშავებულმა ჯამურმა ანაზღაურებამ კი 1.542 მლრდ ლარს გადააჭარბა.

2018 წელთან შედარებით, 165-ით არის გაზრდილი იმ ადამიანთა რაოდენობა, რომლებსაც მილიონზე მეტი წლიური შემოსავალი უფიქსირდებათ.

წლიურად 100 000 ლარზე მეტი ანაზღაურება შარშან 14 ათასზე მეტმა ადამიანმა მიიღო, მათ მიერ მიღებულმა კონსოლიდირებულმა შემოსავალმა კი 4,47 მლრდ ლარი შეადგინა.

ამასთან, ათასობით ადამიანს საქართველოში ჯერ კიდევ ას ლარზე ნაკლები შემოსავალი აქვს. ეს მონაცემები ყოველთვიურად იცვლება და ასლარიან ან უფრო დაბალ ანაზღაურებას, საშუალოდ, 26-იდან 50 000-მდე ადამიანი იღებს.

100 ლარამდე შემოსავალი 2019 წლის იანვარში 45 542-მა ადამიანმა მიიღო, თებერვალში – 28 700-მა, მარტში – 29 823-მა, აპრილში – 26 918-მა, მაისში – 33 195-მა, ივნისში – 29 182-მა, ივლისში – 28 372-მა, აგვისტოში – 48 222-მა, სექტემბერში – 42 945-მა, ოქტომბერში – 28 803-მა, ნოემბერში – 31 588-მა, დეკემბერში კი – 50 525-მა ფიზიკურმა პირმა.

35 000-იდან 55 000-მდე ადამიანისთვის კი 2019-ში ყოველთვიური შემოსავალი 100-იდან 200 ლარამდე მერყეობდა.