რუსული მედია: ლევ ლეშჩენკომ შესაძლოა ათეულობით ვარსკვლავს და პოლიტიკოსს კორონავირუსი გადასდო

რუსი მომღერალი ლევ ლეშჩენკო შეერთებული შტატებიდან სახლში დაბრუნდა, თუმცა სავალდებულო ორკვირიან კარანტინში არ დარჩა. რუსული მედიის ცნობით, იგი იგორ კრუტოის დას ეწვია, რომელიც  დაბადების დღეს აღნიშნავდა. წვეულებაზე რუსეთის შოუბიზნესის ძალიან ბევრი წარმომადგენელი იმყოფებოდა.

სტუმრებს შორის იყო რუსეთის ფედერაციის პრეზიდენტის პრესსმდივანი დიმიტრი პესკოვი მეუღლესთან,  ტატიანა ნავკასთან ერთად,  თუმცა თავად პესკოვმა ჟურნალისტებს განუცხადა, რომ კრუტოის დის დაბადების დღეზე ლეშჩენკო არ უნახავს.

„დიახ, მე ვიყავი იქ, მაგრამ ლეშჩენკო არ მინახავს. როგორც ჩანს, იმ დროისთვის ის უკვე წასული იყო“, – თქვა პესკოვმა.

დაბადების დღის შემდეგ ლეშჩენკომ ერთ-ერთ გადაცემაში მიიღო მონაწილეობა, სადაც განაცხადა, რომ აშშ-ში პანიკა არ არის, ყველაფერი მშვიდად და წყნარადაა.

„კორონავირუსის შესახებ არ არის არანაირი ისტერიული განწყობა. ყველა რესტორანი სავსეა. კონცერტებმა სრული ანშლაგებით ჩაიარა. არ არის საჭირო ესკალაცია! არავის სჭირდება პანიკა. მე ვფიქრობ, რომ ეს ყველაფერი მიზანმიმართულად ხდება. ვერ ვიტყვი ვინ დგას ამ ყველაფრის უკან, მე არც  პოლიტიკოსი და არც ფინანსისტი ვარ. მაგრამ მეჩვენება, რომ სიტუაცია ხელოვნურად შეიქმნა. სერიოზული შედეგების თავიდან ასაცილებლად საუკეთესო გზაა გავაგრძელოთ ცხოვრება ისე, როგორც ვცხოვრობდით აქამდე“, – თქვა მომღერალმა.

24 მარტს ლევ ლეშჩენკო საავადმყოფოში გადაიყვანეს, სადაც მას კორონავირუსის დიაგნოზი დაუსვეს.

espersona.ge