რას ამბობს შენი სიარულის ტემპი შენზე – ბრიტანული მასშტაბური კვლევის საყურადღებო შედეგები

სწრაფი სიარული მხოლოდ ჩვევა არ არის – მეცნიერების თქმით, ის შეიძლება ფიზიკური და მენტალური ჯანმრთელობის ერთ-ერთ მნიშვნელოვან მაჩვენებლად ჩაითვალოს. ამას ადასტურებს ბრიტანეთში ჩატარებული მასშტაბური კვლევაც.

სიარულის ტემპი და სიცოცხლის ხანგრძლივობა

UK Biobank-ის ფარგლებში ჩატარებულ კვლევაში 420 000-ზე მეტი ადამიანი მონაწილეობდა. მეცნიერებმა მათი სიარულის ტემპი შეაფასეს და ჯანმრთელობის სხვადასხვა პარამეტრს შეადარეს.

შედეგი თვალსაჩინო აღმოჩნდა: ადამიანები, რომლებიც სწრაფად დადიან, საშუალოდ უფრო დიდხანს ცოცხლობენ. ეს კავშირი შენარჩუნდა სხეულის მასის ინდექსის ( BMI) მიუხედავადაც – ანუ სწრაფი სიარული დადებით ეფექტს ავლენს როგორც ნორმალური, ისე მომატებული წონის შემთხვევაშიც.

სწრაფი სიარული, როგორც „ბიოლოგიური მარკერი“

ხანგრძლივმა დაკვირვებამ, სხვა შედეგებთან ერთად, გამოავლინა კიდევ ერთი საინტერესო დეტალი: სწრაფი სიარული დაკავშირებულია ტელომერების სიგრძესთან – ეს დნმ-ის დამცავი მონაკვეთებია, რომლებიც ბიოლოგიური ასაკის ერთ-ერთ მთავარ ინდიკატორად ითვლება. რაც უფრო გრძელია ტელომერები, მით „ახალგაზრდად“ მიიჩნევა ორგანიზმი ბიოლოგიური თვალსაზრისით.

კვლევის მიხედვით, სწრაფად მოსიარულე ადამიანები საშუალოდ რამდენიმე წლით მეტხანს ცხოვრობდნენ. ეს ტენდენცია დიდ ჯგუფებშიც შენარჩუნდა, რაც მეცნიერებს საშუალებას აძლევს თქვან, რომ შედეგი შემთხვევითი არ არის.

სწრაფი ნაბიჯი და ტვინის მუშაობა

სხვა კვლევებმა სურათი კიდევ უფრო გაამყარა: სწრაფი სიარული დაკავშირებულია გულ-სისხლძარღვთა სისტემის უკეთ ფუნქციონირებასა და უფრო სწრაფ კოგნიტიურ რეაქციებთან. ასეთ ადამიანებს, როგორც ჩანს, ინფორმაციის დამუშავებაც უფრო სწრაფად შეუძლიათ და გარე სტიმულებზე რეაგირებაც.

ფსიქოლოგიური დაკვირვებები აჩვენებს, რომ სწრაფი ტემპით მოსიარულეები ხშირად გამოირჩევიან ორგანიზებულობით, პასუხისმგებლობის მაღალი გრძნობით, თვითკონტროლითა და მიზანმიმართულობით. ამავე დროს, მათში შედარებით ხშირად გვხვდება მსუბუქი მოუთმენლობაც – თვისება, რომელიც შესაძლოა ბიოლოგიურ და ქცევით ფაქტორებს ერთდროულად უკავშირდებოდეს.

საბოლოოდ, მეცნიერები სწრაფ ნაბიჯს აღიქვამენ, როგორც სხეულის ფიზიკური მდგომარეობისა და შინაგანი მენტალური ენერგიის ერთგვარ კვეთის „წერტილს“ – პატარა დეტალს, რომელიც ადამიანის ჯანმრთელობაზე ბევრს გვიყვება.

თამარ ქავჟარაძე

დაგაინტერესებთ: მენტალური ასაკი: გაიგეთ, სინამდვილეში რამდენი წლის ხართ – ფერების ტესტი

ტესტი: გაიგეთ თქვენი ფსიქოლოგიური ასაკი