66 000 ფიზიკურ პირს 425 მილიონამდე ლარის დავალიანება ჩამოეწერა – ვის ეხება საგადასახადო ამნისტია

საგადასახადო ამნისტიის ფარგლებში, 66 000-ზე მეტ  ფიზიკურ პირს 424 787 142  ლარი უკვე ჩამოეწერა. პროგრამა გულისხმობს 2021 წლის პირველ იანვრამდე წარმოშობილი საგადასახადო დავალიანების განულებას. დავალიანების ჩამოწერის შემდეგ იძულებითი ღონისძიებებიც გაუქმდება, რაც იპოთეკის და ქონების ყადაღას გულისხმობდა. ინფორმაციას ფინანსთა სამინისტროს შემოსავლების სამსახური ავრცელებს. 

„ფინანსთა სამინისტროს შემოსავლების სამსახური გადასახადის გადამხდელებს აცნობებს, რომ  საქართველოს მთავრობის მიერ მიღებული გადაწყვეტილების თანახმად, საგადასახადო კოდექსის 309-ე მუხლის 37-ე  ნაწილის „დ“ ქვეპუნქტის საფუძველზე, დღეის მდგომარეობით – 66 183 ფიზიკურ პირს  424 787 142 ლარი უკვე ჩამოეწერა.

აქვე განვმარტავთ, რომ აღიარებული საგადასახადო დავალიანების ჩამოწერა აქტიურად მიმდინარეობს, როგორც ელექტრონულად www.rs.ge პროგრამული უზრუნველყოფის გამოყენებით (62 593 ფიზიკურ პირზე – 287 244 620 ლარი), ასევე, პირადი მომართვის საფუძველზე (3 590 ფიზიკურ პირზე 152 259 309 ლარი).

შეგახსენებთ, რომ საქართველოს მთავრობის ინიციატივა შეეხება გადასახადის გადამხდელ ყველა ფიზიკურ პირს, მათ შორის, მეწარმე სუბიექტებს და პროცესი გულისხმობს იმ აღიარებული საგადასახადო დავალიანების, დარიცხული საურავების ჩათვლით, ჩამოწერას, რომელიც წარმოშობილია 2021 წლის პირველ იანვრამდე. განმსაზღვრელი ფაქტორი, რის გამოც აღნიშნული პერიოდი (2021 წლის 1-ელ იანვრამდე წარმოშობილი და გადაუხდელი აღიარებული საგადასახადო დავალიანება) შეირჩა, საგადასახადო ხანდაზმულობაა.

ამასთან, მნიშვნელოვანი გარემოებაა, ის რომ დავალიანების ჩამოწერის შემდგომ ფიზიკური პირის მიმართ გადახდევინების უზრუნველსაყოფად განხორციელებული იძულებითი ღონისძიებები – საგადასახადო გირავნობა, იპოთეკა, ქონებაზე ყადაღის დადება და ა. შ. – ავტომატურად გაუქმდება. აღნიშნული საგადასახადო შეღავათი ხელს შეუწყობს მათ აქტიურ ჩართულობას შემდგომ ეკონომიკურ საქმიანობაში“, – აღნიშნულია განცხადებაში.

მათთვის, ვინც ფიქრობს, რომ დავალიანება უნდა ჩამოსწეროდა და არ ჩამოეწერა, სამინისტრომ დამატებითი განმარტება გააკეთა.

„შემოსავლების სამსახურის მიერ განხორციელდა სპეციალური პროგრამული უზრუნველყოფა, რომლის ფარგლებშიც, აღნიშნულ ფიზიკურ პირებს, შესაბამისი დავალიანებები პროგრამულად ეწერებათ. მათ ჩამოწერას მაქსიმუმ ორი სამუშაო დღე სჭირდება, თუმცა მნიშვნელოვანი ვაცნობოთ ჩვენს გადამხდელებს, რომ თუ მათ აქვთ განცდა, რომ უნდა ჩამოწეროდათ დავალიანება და არ ჩამოეწერათ, უფლება აქვთ, განცხადებით მოგვმართონ. განცხადების წარდგენა მარტივია – შესაძლებელია როგორც მატერიალური, ისე ონლაინ პორტალით“, – განაცხადა საგადასახადო ადმინისტრირების მეთოდოლოგიის სამმართველოს უფროსმა იონა კიზირიამ.