იტალიელმა კაცმა მე-5 სართულიდან გადმოვარდნილი 3 წლის ბავშვი სასწაულებრივად გადაარჩინა
37 წლის იტალიელი ბანკირი მატია აგუზი გმირად აღიარეს მას შემდეგ, რაც ტურინში მეხუთე სართულის აივნიდან გადმოვარდნილი 3 წლის ბავშვის დაჭერა და გადარჩენა შეძლო. ინფორმაციას news.sky.com ავრცელებს.
შაბათს დილით აგუზი შეყვარებულთან ერთად ქალაქის ცენტრში საცხობში მიდიოდა, როცა კაცის ყვირილი გაიგონა. მატიამ ზემოთ აიხედა და მე-5 სართულის აივანზე ბავშვი დაინახა, რომელიც აივნის მოაჯირზე იყო აცოცებული და სულ უფრო და უფრო იხრებოდა გარეთ.
„რომ ავიხედე, პატარა გოგონას ფეხები უკვე ჰაერში ჰქონდა და მოაჯირს ხელებით იყო ჩაბღაუჭებული. თავიდან მეც ყვირილი დავიწყე… როცა მივხვდი, რომ ვარდებოდა, დავდექი, თვალები დავხუჭე და იმედი მქონდა, რომ ყველაფერი კარგად დასრულდებოდა. დარტყმის სიძლიერე შევამცირე და ორივე მიწაზე დავეცით“, – განაცხადა მატიამ.
მისი თქმით, თავიდან ბავშვს სიცოცხლის ნიშანწყალი არ ეტყობოდა, შემდეგ კი ატირდა და მანაც შვებით ამოისუნთქა.
პატარა გოგონაც და მისი გადამრჩენელიც მცირე დაზიანებებით საავადმყოფოში გადაიყვანეს.
ტურინის მერმა მატიას აგუზის გმირი უწოდა და განაცხადა, რომ მას საპატიო მოქალაქის ტიტულს მიანიჭებენ. მატიას თქმით კი, მას გმირობა არ ჩაუდენია, რადგან ეს ყველაფერი ბუნებრივად მოხდა.
მომხდარ ფაქტს გამოეხმაურა იტალიის პრემიერ-მინისტრი ჯორჯია მელონი – მან X-ზე (ადრე ცნობილი, როგორც Twitter) დაწერა, რომ გოგონას ამბავი შეიძლება ტრაგედიად ქცეულიყო, რომ არა ახალგაზრდა გმირი და მას მადლობა გადაუხადა.
Poteva trasformarsi in tragedia la vicenda di una bimba caduta dal 5° piano di un balcone in un edificio a Torino. Ma grazie alla prontezza di Mattia Aguzzi, che l’ha vista precipitare e afferrata al volo, la sua vita è salva. Tanto onore e gratitudine per questo giovane eroe. pic.twitter.com/B6yzkEYZan
— Giorgia Meloni (@GiorgiaMeloni) August 27, 2023
ნანა ძნელაძე
კომენტარები