ბათუმი უკვე მეორედ გახდა ტურისტული „ოსკარის“ მფლობელი

ბათუმმა ევროპის სწრაფად მზარდი ტურისტული მიმართულების ჯილდო, ტურისტული „ოსკარი“ მოიპოვა. ამ ინფორმაციას აჭარის მთავრობის თავმჯდომარე თორნიკე რიჟვაძე ავრცელებს.

„World Travel Awards-ის დაჯილდოების ცერემონიაზე ბათუმმა ევროპის სწრაფად მზარდი ტურისტული მიმართულების ჯილდო მოიპოვა.

ბათუმი ოფიციალურად დასახელდა, როგორც 2023 წლის World Travel Awards-ის დაჯილდოების ღონისძიების მასპინძელი ქალაქი“, – წერს თორნიკე რიჟვაძე სოციალურ ქსელში.

ბათუმის მერიის ცნობით, World Travel Awards-ის პრესტიჟულ დაჯილდოებაზე ბათუმმა 10 ქვეყნის ტურისტულ მიმართულებას შორის მოიპოვა გამარჯვება.

აღსანიშნავია, რომ ბათუმმა „ტურისტული ოსკარი“ 2019 წელსაც დაიმსახურა.

World Travel Awards-ის დაჯილდოება 1993 წლიდან ტარდება. ასობით ნომინაცია და ათასობით ნომინანტი კონტინენტებისა და ქვეყნების მიხედვით სხვადასხვა კატეგორიაშია გადანაწილებული, როგორიცაა: წამყვანი სასტუმროები, ტურისტული სააგენტოები, ტურისტული ატრაქციონები, მიმართულებები, ტუროპერატორები, აგრეთვე, საზღვაო, სახმელეთო, საჰაერო ტრანსპორტის კომპანიები და ა. შ.