სულ ცოტა, 66 ადამიანი დაიღუპა თურქეთის სათხილამურო კურორტზე ხანძრის შედეგად
სულ ცოტა, 66 ადამიანი დაიღუპა თურქეთის პოპულარულ სამთო-სათხილამურო კურორტზე მდებარე სასტუმროში გაჩენილი ხანძრის შედეგად. დაშავებულია 51 ადამიანი, რომელთაგან ნაწილის მდგომარეობა მძიმეა. ტრაგიკული შემთხვევა ბოლუს პროვინციის კურორტ კარტალკაიაში მოხდა, რომელიც ქოროღლუს მთებში მდებარეობს, სტამბოლიდან 270 კმ-ის დაშორებით.
მედიის ინფორმაციით, ცეცხლი სამშაბათს ღამით, ადგილობრივი დროით 03:30 საათზე გაჩნდა 11-სართულიანი სასტუმროს ერთ-ერთ სართულზე და სწრაფად გავრცელდა. ამჟამად თურქეთში საერთოეროვნული ორკვირიანი არდადეგებია და 161-ნომრიან სასტუმროში 234 ადამიანი იყო დაბინავებული.
გარედან ხისგან მოპირკეთებული სასტუმროს განლაგებამ საგანგებო სამსახურებს ცეცხლის ჩაქრობა და სამაშველო ოპერაცია გაურთულა. სტუმრების ნაწილი ცეცხლმოკიდებული შენობიდან თავის დაღწევას ფანჯრებიდან ცდილობდა თეთრეულისგან გაკეთებული თოკებით. მედიის ცნობით, სულ ცოტა, 2 ადამიანი დაიღუპა ფანჯრიდან თავის დაღწევის მცდელობისას.
ადგილზე მობილიზებული იყო საგანგებო სამსახურის ბრიგადები, მათ შორის 30 სახანძრო მანქანა და სასწრაფო სამედიცინო დახმარების 28 მანქანა. ცეცხლის ჩაქრობასა და სამაშველო ოპერაციაში 231 მეხანძრე-მაშველი მონაწილეობდა, თუმცა რამდენადაც სასტუმრო ბოლუს ცენტრიდან შორს მდებარეობს (38 კმ), აგრეთვე, ყინვის გამო სახანძრო-სამაშველო სამსახურის ტექნიკას სასტუმრომდე მისაღწევად საათზე მეტი დასჭირდა.
სამაშველო ოპერაცია დილითაც გრძელდებოდა, მაშინ გახდა ცნობილი, რომ მაშველები ჯერ კიდევ ცდილობდნენ სასტუმროს ზოგიერთ ნაწილამდე შეღწევას.
როგორც ბოლუს გუბერნატორმა აბდულაზიზ აიდინმა განაცხადა, ცეცხლის გაჩენის მიზეზი ჯერჯერობით უცნობია, თუმცა წინასწარი მონაცემებით, ხანძარი მეოთხე სართულზე გაჩნდა, სადაც რესტორანი იყო განთავსებული და ზედა სართულებზე სწრაფად გავრცელდა.
იუსტიციის მინისტრმა ილმაზ ტუნჩმა თქვა, რომ ხანძართან დაკავშირებით დაწყებულ გამოძიებაში პროკურატურა ჩაერთო.
თურქეთის პრეზიდენტმა რეჯეფ თაიფ ერდოღანმა დაღუპულთა ოჯახებს მიუსამძიმრა, დაშავებულებს კი მალე გამოჯანმრთელება უსურვა.
ნანა ძნელაძე
კომენტარები