სათხილამურო კურორტი გოდერძი ევროპაში საუკეთესოა – European Best Destinations
გავლენიანი სამოგზაურო პლატფორმა European Best Destinations ევროპის საუკეთესო ზამთრის კურორტების რეიტინგს აქვეყნებს. სიაში სამთო კურორტი გოდერძი პირველ ადგილზეა. 12 საუკეთესო მიმართულებას შორის, საქართველოს კურორტთან ერთად, საფრანგეთის, იტალიის, შვეიცარიისა და ავსტრიის სამთო-სათხილამურო მიმართულები მოხვდნენ.
სამოგზაურო პლატფორმა მკითხველს აჭარის სამთო კურორტის უპირატესობების შესახებ აწვდის ინფორმაციას და მკითხველს ქართული სტუმარმასპინძლობის შესახებაც მოუთხრობს.
„თუ ევროპაში საუკეთესო სათხილამურო თავგადასავლებს, ყველაზე ლამაზ სამთო ტრასებს, საუკეთესო ინფრასტრუქტურას და, უბრალოდ, ზამთრის არდადეგებზე გარანტირებულად ეძებთ თოვლს, მაშინ დაგეხმარებით. აღმოაჩინეთ აჭარის რეგიონში უმაღლესი ხარისხის კურორტი გოდერძი, რომელიც წელს ევროპის ყველაზე ცნობილ კურორტებზე წინ დასახელდა. აქ ისტორიის შარმისა და თანამედროვე ინოვაციების ნაზავი გელოდებათ“, – წერს European Best Destinations-ი.
სამოგზაურო პლატფორმა მკითხველს ინფორმაციას აწვდის აჭარის სამთო კურორტის უპირატესობების შესახებ.
„კურორტი გოდერძი ზამთრის სამოთხეა მოთხილამურეებისა და სნოუბორდისტებისთვის. აჭარაში მდებარე კურორტი ევროპის მთავარი სამთო მიმართულებაა, რომელიც ზამთრის საუკეთესო თავგადასავლებს გთავაზობთ. აქ ზამთრის გრძელი სეზონი გელოდებათ. თოვლი გარანტირებულია ნოემბრიდან აპრილის შუა რიცხვებამდე. კურორტის უნიკალური ალპური და სუბტროპიკული კლიმატის ნაზავი მაღალი ხარისხის თოვლს წარმოქმნის, რაც ნამდვილი სამოთხეა მოთხილამურეებისთვის. გოდერძი თანამედროვე ინფრასტრუქტურით, სამთო საბაგიროებით, გონდოლებითა და ტრასებით გამოირჩევა. კურორტი მორგებულია როგორც დამწყებ, საოჯახო, ისე პროფესიონალ მოთხილამურეებზე. გოდერძი ევროპის ერთ-ერთი ულამაზესი ზამთრის კურორტია, აქ ბუნების სილამაზე განწყობას ამაღლებს და მშვიდ ფონს გთავაზობთ სრიალისა და დასვენებისთვის“, – წერს სამოგზაურო პლატფორმა და არც სტუმართმოყვარეობით სავსე ატმოსფეროს აღნიშვნა ავიწყდება.
„სტუმართმოყვარე ატმოსფეროთი განთქმული გოდერძი სტუმრებს თავს ისე აგრძნობინებს, როგორც საკუთარ სახლში. ადგილობრივები ამაყობენ იმით, რომ სტუმრებს განსაკუთრებულ მომსახურებას სთავაზობენ, რაც იქ ყოფნას ყველა ვიზიტორისთვის დაუვიწყარს ხდის“.
მსგავს თემაზე: თბილისმა ისეთ ქალაქებს გაუსწრო, როგორიცაა: პრაღა, იბიცა და ედინბურგი – ევროპის საუკეთესო მიმართულებების რეიტინგი
კომენტარები