43 წლის კატრიენ ვან ოპსტალმა საკუთარ თავზე დაქორწინება გადაწყვიტა. ასეთი პრაქტიკა სხვა ქვეყნებში უკვე არსებობს, მაგრამ ბელგიაში პირველი შემთხვევაა.

როგორც Het Laatste Nieuws იუწყება, საკუთარ პერსონაზე ქორწინების სურვილს კატრიენი საკმაოდ მარტივად ხსნის: „ბევრი ადამიანი ამბობს ხოლმე, რომ საკუთარ თავზე თავადვე იზრუნებს, მაგრამ მალე თავისი ნათქვამი ავიწყდება. მინდა არა მხოლოდ ვთქვა, რომ კარგ და ცუდ დროში საკუთარი თავის ერთგული დავრჩები, არამედ ვაპირებ, ამას საზეიმო იერ-სახე მივცე. საკუთარი თავზე ქორწინება ნიშნავს, რომ მე მისთვის (ჩემთვის) ვცხოვრობ, მასზე (ჩემზე) ვფიქრობ და ამას ყოველთვის შემახსენებს საქორწინო ცერემონია, ბეჭედი და ფოტოები. ამიტომ, მინდა, საკუთარი თავის სიყვარული არასდროს დავივიწყო“.

რამდენად კანონიერია ბელგიაში ამის გაკეთება?

თუმცა, საკუთარი თავით „დაინტერესებული“ პირის თქმით, ყველაფერი არც ისე მარტივი გამოდგა, როგორც თავიდან ეგონა. „კომუნაში წავედი. ჯერ ჩემი უფლებებისა და მოვალეობების შესახებ ვიკითხე. დავსვი კითხვა, შეიძლებოდა თუ არა ჩემი ქორწინება სხვა პარტნიორებისთვისაც ღია ყოფილიყო. მოგვიანებით, როცა ვთქვი, რომ საკუთარ თავზე დაქორწინება მსურდა, სიჩუმე ჩამოვარდა. მერე მიპასუხეს, ამის გაკეთება არ შეიძლებოდა, რადგან კომპიუტერს ეროვნული რეესტრის ორი განსხვავებული ნომერი სჭირდებოდა, წინააღმდეგ შემთხვევაში, ის „შეცდომას“ დააფიქსირებდა. ასე რომ, კანონით ეს შეუძლებელია, რადგან კომპიუტერი „არა“-ს ამბობს“. მაგრამ გაწბილებული საპატარძლო დაბრკოლებამ ვერ შეაშინა და გადაწყვიტა, თავგადასავალი გააგრძელოს: „მინდა, რომ ყველაფერი რაც შეიძლება ოფიციალური იყოს. დიახ, მე მინდა ცერემონია ბურგომისტრთან, რომელიც ჩემს ქორწილშიც ისევე იხუმრებს, როგორც ამას ყველა სხვა წყვილთან აკეთებს. ასევე მინდა საქორწილო ბუკლეტი, ჭიქა ყავა ჩემთვის და ჩემი მეუღლისთვის, მოსაწვევი ბარათიც მინდა და მსურს, როგორც ყველა სხვა პატარძალმა და საქმრომ, ამაში მეც 30 ევრო გადავიხადო“.