ვინ შეცვლის ირაკლი ღარიბაშვილს – საქართველოს პარლამენტმა ახალი პრემიერ-მინისტრი და მთავრობის შემადგენლობა ორი კვირის ვადაში უნდა დაამტკიცოს

ირაკლი ღარიბაშვილი პრემიერ-მინისტრის პოსტიდან გადადგა – უკვე მეორედ და ისევ მოულოდნელად. პირველად იგი მთავრობის მეთაურის თანამდებობას 2015 წლის ბოლოს დაემშვიდობა. ღარიბაშვილის თქმით, პოლიტსაბჭოსგან მიიღო შეთავაზება, დაიკავოს პარტია „ქართული ოცნების“ თავმჯდომარის თანამდებობა. ირაკლი კობახიძეს კი, რომელიც ამ დრომდე „ქართული ოცნების“ თავმჯდომარის პოსტს იკავებს, როგორც პარტიაში ადასტურებენ, მომავალ პრემიერ-მინისტრად განიხილავენ. პარტიის თავმჯდომარის ცვლილების თაობაზე „ქართული ოცნების“ ყრილობა პირველ თებერვალს გაიმართება.

საქართველოს პარლამენტმა ახალ პრემიერსა და მთავრობის შემადგენლობას ნდობა პრემიერისთვის უფლებამოსილების შეწყვეტიდან ორი კვირის ვადაში უნდა გამოუცხადოს.

კერძოდ, პარლამენტის რეგლამენტის თანახმად, პარლამენტი საქართველოს მთავრობის უფლებამოსილების მოხსნიდან, აგრეთვე, საქართველოს პრემიერ-მინისტრის გადადგომიდან ან უფლებამოსილების სხვაგვარად შეწყვეტიდან ორი კვირის ვადაში ნდობას უცხადებს პარლამენტის არჩევნებში საუკეთესო შედეგის მქონე პოლიტიკური პარტიის მიერ წამოყენებული პრემიერ-მინისტრობის კანდიდატის მიერ წარდგენილ საქართველოს მთავრობას.

საქართველოს მთავრობის შემადგენლობასთან ერთად პარლამენტს სამთავრობო პროგრამაც წარედგინება.

პარლამენტს პრემიერ-მინისტრობის კანდიდატის მიერ წარდგენილი საქართველოს მთავრობის შემადგენლობა და სამთავრობო პროგრამა უნდა წარედგინოს საქართველოს მთავრობის უფლებამოსილების მოხსნიდან ან საქართველოს პრემიერ-მინისტრის გადადგომიდან, ან უფლებამოსილების სხვაგვარად შეწყვეტიდან არაუგვიანეს მე-9 დღისა.

პარლამენტის კომიტეტები, დარგობრივი სპეციალიზაციის მიხედვით და ფრაქციები განიხილავენ საქართველოს მთავრობის სამთავრობო პროგრამას და საქართველოს მთავრობის შემადგენლობისთვის ნდობის გამოცხადების საკითხს, შესაბამის დასკვნებს კი პარლამენტის ბიუროს წარუდგენენ -.

რეგლამენტის შესაბამისად, ერთ დღეს დასაშვებია მხოლოდ ორი მოსმენის გამართვა ამ პუნქტით გათვალისწინებული საკითხის განხილვის მიზნით. კომიტეტის დასკვნა მიიღება მის სხდომაზე დამსწრე კომიტეტის წევრთა ხმების უმრავლესობით (15.11.2023. №3665).

პარლამენტის კომიტეტებისა და ფრაქციების დასკვნების საფუძველზე პარლამენტის ბიუროს საქართველოს მთავრობის შემადგენლობისა და სამთავრობო პროგრამისთვის ნდობის გამოცხადების საკითხი შეაქვს პარლამენტის პლენარული სხდომის დღის წესრიგში.

პარლამენტი კანონპროექტის პირველი მოსმენით განხილვისათვის რეგლამენტით დადგენილი წესით პლენარულ სხდომაზე განიხილავს და კენჭს უყრის საქართველოს მთავრობის შემადგენლობისათვის ნდობის გამოცხადების საკითხს.

რეგლამენტის მიხედვით, პარლამენტის ნდობის მისაღებად საჭიროა პარლამენტის სრული შემადგენლობის უმრავლესობის მხარდაჭერა.

თუ საქართველოს მთავრობამ საქართველოს კონსტიტუციის 56-ე მუხლის მე-2 პუნქტით დადგენილ ვადაში ვერ მიიღო ნდობა, პარლამენტი ამ ვადის ამოწურვიდან 2 კვირის ვადაში, სრული შემადგენლობის უმრავლესობით, ამ მუხლით დადგენილი წესით, ნდობას გამოუცხადებს პარლამენტის სრული შემადგენლობის ერთ მესამედზე მეტის მიერ წამოყენებული პრემიერმინისტრობის კანდიდატის მიერ წარდგენილ საქართველოს მთავრობას.

ერთზე მეტი პრემიერმინისტრობის კანდიდატის არსებობის შემთხვევაში პარლამენტი განიხილავს პრემიერმინისტრობის იმ კანდიდატს, რომელიც პარლამენტის უფრო მეტმა წევრმა წარადგინა, ხოლო წარმდგენთა თანაბარი რაოდენობის შემთხვევაში − იმ კანდიდატს, რომელიც უფრო ადრე იქნა წარდგენილი. თუ საქართველოს მთავრობის შემადგენლობის წარდგენა ემთხვევა საპარლამენტო არდადეგებს ან იმ კვირას, როდესაც პლენარული სხდომები არ იმართება, რეგლამენტით დადგენილი წესით, მოიწვევა რიგგარეშე სესია ან რიგგარეშე სხდომა.