წამლებთან ერთად გრეიპფრუტის მიღება შეიძლება ზედმეტად სახიფათო აღმოჩნდეს
ადამიანები საკმაოდ ამტანები ვართ მრავალი თვალსაზრისით, მაგრამ არსებობს ბევრი საფრთხე, რომელმაც უყურადღებობის შემთხვევაში, შეიძლება სერიოზული პრობლემები შეგვიქმნას.
მაგალითად, ავიღოთ გრეიპფრუტის წვენი, რომელსაც შეიძლება დილით მიირთმევდეთ. ბევრი ადამიანისთვის ის გემრიელი, ჯანსაღი, ვიტამინებითა და მინერალებით სავსე პროდუქტია.
თუმცა ზოგიერთ მედიკამენტთან ერთად მიღებისას გრეიპფრუტი შეიძლება ფატალური აღმოჩნდეს.
სულ უფრო მეტი კვლევა მიუთითებს, რომ ქიმიური ნაერთების კლასის, სახელად ფურანოკუმარინების ორი წევრი, რომელიც გრეიპფრუტში გვხვდება, გარკვეული მედიკამენტების ათვისებას ამცირებს ან აძლიერებს.
ეს ყველაფერი კი, თავის მხრივ, ორგანიზმს უშლის ხელს გარკვეულ ორალურ მედიკამენტთა მეტაბოლიზებაში. შედეგად, თქვენს სისხლში უფრო მეტი პრეპარატი შეიწოვება და იქ დიდხანს რჩება, რაც ზედოზირების ეფექტს წარმოქმნის მაშინაც კი, თუ წამლის სწორი დოზა მიიღეთ. ასეთი წამლები კი საკმაოდ ბევრია, ქოლესტერინის ან სისხლის წნევის პრეპარატებით დაწყებული, კიბოს ან მღელვარების საწინააღმდეგო პრეპარატებით დამთავრებული.
უკიდურეს, მაგრამ საბედნიეროდ იშვიათ შემთხვევებში, ასეთი ზემოქმედება შეიძლება ფატალურად დასრულდეს.
ზოგიერთ მედიკამენტზე გრეიპფრუტს შეიძლება საპირისპირო ეფექტი ჰქონდეს. მაგალითად, ანტიჰისტამინურ პრეპარატ ფექსოდენადინის მიღებისას გრეიპფრუტის მოხმარება მის ეფექტიანობას ამცირებს. მიუხედავად იმისა, რომ პოტენციური გვერდითი ეფექტები მწვავე არ არის, ნამდვილად არაა სასიამოვნო, როდესაც აღმოაჩენ, რომ ალერგიის წამალი ისე ეფექტიანად არ მოქმედებს, როგორც უნდა მოქმედებდეს.
თუ მნიშვნელოვან მედიკამენტებს იღებთ და ამ დროს გრეიპფრუტის მოყვარულიც ხართ, აუცილებლად ჰკითხეთ თქვენს ექიმს ან ფარმაცევტს, არსებობს თუ არა პოტენციური ზემოქმედების საფრთხე.
(შემოკლებული ვერსია)
მომზადებულია ScienceAlert-ის მიხედვით.
ავტორი – მიხეილ ჭაბუკაშვილი
1tv.ge
