სოკოს სალათა – „დელიკატესი“ საახალწლო სუფრისთვის
საახალწლო სუფრა ყოველთვის განსაკუთრებულ კერძებს ითხოვს – ისეთებს, რომლებიც ერთდროულად მსუბუქიცაა, არომატულიც და ვიზუალურად მიმზიდველიც. სოკოს სალათა კვერცხით, ყაბაყითა და ბადრიჯნით სწორედ ასეთი „დელიკატესია“: გემოების ჰარმონიული შეხამება, სადღესასწაულო გაფორმების შესაძლებლობა და მომზადების პროცესის სიმარტივე მას იდეალურ არჩევანად აქცევს ახალი წლის სუფრისთვის. ეს სალათა უხდება როგორც ხორციან კერძებს, ისე მსუბუქ მენიუს და განსაკუთრებულ ხიბლს სძენს ნებისმიერ დღესასწაულს.
საჭირო პროდუქტი:
400 გ ახალი სოკო, 10 კვერცხი, 200 გ ყაბაყი, 400 გ ბადრიჯანი, 200 გ მცენარეული ზეთი, 3-4 ს/კ ძმარი (სიმაგრის მიხედვით), 2 ს/კ შაქარი, მარილი, მწვანილი, ცხარე წიწაკა – გემოვნებით (გათვლილია 10 ულუფაზე, საჭიროების შემთხვევაში ინგრედიენტების რაოდენობა პროპორციულად გაზარდეთ).
მომზადების წესი:
სოკო მოხარშეთ, შეაგრილეთ და დაჭერით მოგრძო, თხელ ნაჭრებად. ყაბაყი გათალეთ, გამოაცალეთ თესლი, დაჭერით პატარა ნაჭრებად და 50 მლ ზეთში დაბრაწეთ. ბადრიჯანი გათალეთ (ან კანიანადაც შეგიძლიათ შეწვათ, როგორც გირჩევნიათ), დაჭერით პატარა ნაჭრებად და დაბრაწეთ დანარჩენ ზეთში.
მაგრად მოხარშეთ კვერცხი, გაფცქვენით, გადაჭერით თავი, ფრთხილად ამოიღეთ გული, ისე რომ ცილა არ დააზიანოთ. გული დაჭერით პატარა ოთხკუთხედ ნაჭრებად. გაგრილებული პროდუქტები შეურიეთ ერთმანეთს, შეკმაზეთ წიწაკის, ძმრისა და მარილის ნარევით. მზა სალათით ამოავსეთ მოხარშული კვერცხის ცილა, დაალაგეთ განიერ ლანგარზე და გემრიელად მიირთვით!
სადღესასწაულოდ შეგიძლიათ გააფორმოთ – სალათის ფოთლებზე დააწყოთ და ზემოდან ბროწეული ან წითელი ბულგარული წიწაკისგან გამოჭრილი რგოლები მოაყაროთ.
ასევე ძალიან მოგეწონებათ: სოკოს კატლეტები მწვანილით და ნიგვზით (სამარხვო)
