ვატიკანმა კათოლიკურ ეკლესიაში ტრანსგენდერი ადამიანების მონათვლა, ნათლიობა და ჯვრისწერისას მეჯვარეობა დაუშვა

კათოლიკურმა ეკლესიამ ტრანსგენდერ ადამიანებს უფლება მისცა, მოინათლონ ან თვითონ მონათლონ სხვა ადამიანი. ამის შესახებ BBC წერს.

გამოცემის ინფორმაციით, ვატიკანის ახალი დოქტრინა მათ ჯვრისწერის დროს მეჯვარის ფუნქციის შესრულების უფლებასაც ანიჭებს. ამასთან, დოქტრინაში აღნიშნულია, რომ ეს დასაშვებია მხოლოდ იმ შემთხვევაში, „თუ საჯარო სკანდალის ან მორწმუნეებს შორის დეზორიენტაციის რისკს არ გაზრდის“.

ვატიკანის განახლებული პოზიცია ამ საკითხზე ცნობილი გახდა მას შემდეგ, რაც ბრაზილიელმა ეპისკოპოსმა ხოსე ნეგრიმ ვატიკანის რწმენის დოქტრინის დიკასტერიას 6 კითხვა მისწერა ლგბტ ადამიანებთან, მათ ქორწინებასა და ნათლობასთან დაკავშირებით.

გასულ ოთხშაბათს უწყებამ თავის საიტზე განათავსა პასუხების 3 გვერდი, რომელსაც ხელს აწერს დიკასტერიის მეთაური – არგენტინელი კარდინალი ვიქტორ მანუელ ფერნანდესი, პაპ ფრანცისკეს თანხმობით. როგორც ცნობილია, პაპს არაერთხელ განუცხადებია, რომ ეკლესია ღია უნდა იყოს ყველასთვის, მათ შორის, ლგბტ პირებისთვისაც.

პაპმა, აგრეთვე, გარკვევით თქვა, რომ ეკლესია ჰომოსექსუალობას მიიჩნევს „ისეთივე ცოდვად, როგორც ქორწინების გარეშე შემდგარ ნებისმიერ სექსუალურ აქტს“, რადგან კათოლიკური სწავლება ქორწინებას განმარტავს, როგორც „მამაკაცსა და ქალს შორის ერთობას შვილების გაჩენის მიზნით“.

დოკუმენტი 31 ოქტომბერს მზად იყო, თუმცა მხოლოდ ახლაღა გახდა საჯარო.

თუმცა პაპმა დასძინა, რომ კათოლიკური ეკლესია ერთსქესიანთა ურთიერთობებს ძველებურად ცოდვად მიიჩნევს და ერთსქესიანთა ქორწინებებს არ აღიარებს.