რა გზა აირჩია იტალიამ გადასახადების შესამცირებლად – რეგულაცია, რომელმაც ფინანსური წრეები გააკვირვა

იტალიაში ბანკებს ზემოგების მიღების შემთხვევაში უკვე მიმდინარე წელს 40%-იანი გადასახადი დაუწესდებათ. ვიცე-პრემიერმა და ინფრასტრუქტურის მინისტრმა მატეო სალვინიმ განაცხადა, რომ ამ სახსრებს იპოთეკარების დასახმარებლად და გადასახადების შესამცირებლად გამოიყენებს. ეს რეგულაცია, რომელმაც „ბლუმბერგის“ ინფორმაციით, ბაზრები და ფინანსური წრეები გააკვირვა, იტალიის მთავრობამ ორშაბათს, გვიან ღამით, საზაფხულო შესვენების წინ გამართულ ბოლო სხდომაზე დაამტკიცა.

იტალიის მთავრობამ საბანკო გადასახადი იმ ღონისძიებების პაკეტში შეიტანა, რომელიც საკმაოდ ფართო სპექტრს მოიცავს – ტაქსების ლიცენზირებიდან დაწყებული და უცხოურ ინვესტიციებით დამთავრებული. სააგენტო „ანსა“-ს (ANSA) ცნობით, ამ გადასახადმა სახელმწიფო ხაზინა, შეიძლება, ორ მილიარდ ევროზე მეტითაც კი შეავსოს.

„საკმარისია 2023 წლის პირველ ნახევარში ბანკების მოგებას უბრალოდ გადახედოთ, რათა დარწმუნდეთ, რომ საუბარია არა რამდენიმე მილიონიან, არამედ მილიარდობით მოგებაზე, რაც, სხვა ფაქტორებთან ერთად, ევროპის ცენტრალური ბანკის განაკვეთების ზრდის შედეგია,“, – აღნიშნა სალვინიმ რომში გამართულ პრესკონფერენციაზე, რომელზეც ის პრემიერმინისტრ ჯორჯია მელონის გარეშე გამოცხადდა. როგორც „ბლუმბერგი“ აღნიშნავს, ულტრამემარჯვენე ლიგის ლიდერი მმართველი კოალიციის ყველაზე აქტიური წევრია, როდესაც საქმე პოპულისტურ საკითხებს ეხება.

„თუ ფულის ღირებულება მოსახლეობისა და ბიზნესისთვის გაორმაგდა, და ეს მართლაც ასეა, ის თანხები, რასაც მიმდინარე ანგარიშის მფლობელები დივიდენდების სახით იღებენ, ნამდვილად არ გაორმაგებულა,” – განაცხადა სალვინიმ და დასძინა, რომ დიდი განსხვავებაა სესხებისთვის დაწესებულ განაკვეთებსა და განაკვეთებს შორის, რომლის მიხედვითაც ბანკები მეანაბრეებს დივიდენდებს უხდიან.

ბანკები საპროცენტო განაკვეთებს ზრდიან

იტალიური ბანკების მოგება 2023 წლის პირველ ნახევარში მკვეთრად გაიზარდა, რადგან საპროცენტო განაკვეთების მატებამ დაკრედიტების გზით მიღებული შემოსავლები გაზარდა. ბანკებმა, „სანპაოლო სპა“-მ (Sanpaolo SpA) და „უნიკრედიტ სპა“-მ (UniCredit SpA), გასულ თვეში, ევროპის ცენტრალური ბანკის მიერ მონეტარული პოლიტიკის სწრაფი გამკაცრების საპასუხოდ, მთელი წლის საპროგნოზო მაჩვენებელი, ორი კვარტლის განმავლობაში, მიყოლებით გაზარდეს.

აპრილში „როიტერმა“ გაავრცელა ინფორმაცია, რომლის თანახმად, იტალიის მთავრობა გეგმავდა ბანკებისთვის გადასახადების გაზრდას, რათა დახმარებოდა იმ ოჯახებს, რომლებსაც ცხოვრების გაძვირების გამო, ხარჯები გაეზარდათ. ივნისში ეკონომიკის მინისტრმა ეს ინფორმაცია უარყო. იტალიის მთავრობამ, მათ შორის პრემიერმინისტრმა მელონიმ, ევროპის ცენტრალური ბანკი, საპროცენტო განაკვეთების მრავალჯერ გაზრდის გამო, არაერთხელ გააკრიტიკა.