ციკლონი „ელპისი“ – თოვლმა ათენში პრობლემები შექმნა (ვიდეო)

დროებით შეჩერდა აეროპორტის მიმართულებით ელექტრომატარებლების მოძრაობა.

ზოგიერთ ხაზზე შეჩერდა ტრამვაის მოძრაობაც (მაგ., ვულიაღმენის გაჩერებაზე) ლიანდაგების მოყინვის გამო.

როგორც TRAINOSE-ი იტყობინება, ამინდის პირობების გამო დღეს აღარ განხორციელდება ნაშუადღევის ადგილობრივი მარშრუტები ქალაქგარე რკინიგზის მონაკვეთზე კოროპი -კანძა.

ძლიერი თოვის გამო სერიოზული პრობლემები წარმოიშვა გზებზე მთელ ატიკის რეგიონში.

TRAINOSE-ის ინფორმაციით, დღეს გაუქმდა რეისები:

• 1546, 1551, 1554, 1559 ათენი – ქალკიდის მონაკვეთზე;
• 2238, 2239, 2246, 2247 აეროპორტი – ა. ლიოსიის მონაკვეთზე.

„ელპისის“ პირველი დარტყმა 22 იანვარს, შაბათს კიკლადის კუნძულებმა მიიღეს.

თოვლი მოვიდა ატიკის რეგიონში, ძირითადად, ჩრდილოეთ და აღმოსავლეთ ნაწილებში, მთებზე.

ტემპერატურა მინუსის მაჩვენებლებზე დაეცა თავად საბერძნეთის დედაქალაქ ათენშიც კი, სადაც ამ დროისთვის წყალთოვაა.

ატიკაში, ადგილობრივი ხელისუფლების გადაწყვეტილებით, უსაფრთხოების მიზნით,  24 და 25 იანვარს სკოლები დაიკეტა.

ბავშვებმა და დიდებმა თოვლში გართობით იჯერეს გული არა რომელიმე სამთო-სათხილამურო კურორტზე, არამედ ათენიდან სულ რაღაც 16 კმ-ის დაშორებით, გლიფადის პლაჟზე.

ნინო ბაჯელიძე