მთელი მსოფლიო არეულია, ჩვენთანაც, აქეთ-იქეთ არეულები დადიან, შეიძლება მათ შორის ერთ-ერთი მეც ვიყო – მეუფე იაკობი

მთელი მსოფლიო არეულია და ნუ გიკვირთ, რომ ჩვენთანაც, აქეთ-იქეთ არეულები დადიან. შეიძლება მათ შორის ერთ-ერთი მეც ვიყო, – ამის შესახებ ბოდბელმა მიტროპოლიტმა, იაკობმა სამების საკათედრო ტაძარში სადღესასწაულო წირვის დასრულების შემდეგ, ქადაგებისას განაცხადა.

ქადაგებისას მეუფემ ღვთისმშობლის ტაძრად მიყვანების დღესასწაულის მნიშვნელობაზეც ისაუბრა და აღნიშნა, რომ ბედნიერია ჩვენი ერი, რადგან მას ყოვლადწმინდა ღვთისმშობელი მფარველობს.

როგორც მიტროპოლიტმა აღნიშნა, ქართველებმა ერთმანეთი უნდა შევიყვაროთ და შერიგება, პირველ რიგში, ეკლესიის წიაღში უნდა მოხდეს.

„რამდენი წელია ვიძახდი – შევრიგდეთ, შევრიგდეთ, მაგრამ შერიგება უნდა მოხდეს ეკლესიაში. როცა ვამბობდი შერიგებას, ეკლესიაში ვეძახდი ყველას, რომ ეს ეკლესიაში მომხდარიყო, იმიტომ რომ შეიძლება ისეთი რამ გვქონდეს სათქმელი ერთმანეთთან, გარეთ გამოტანა არ ღირდეს. როგორც ღმერთი ინახავს ჩვენს ცოდვებს და არ ანახებს, თუ ვინ ვართ, ასევე შეიძლება არ იყოს საჭირო, რომ ერთმანეთს წამოვაძახოთ. როცა ეკლესიაში ვიქნებით, სათქმელსაც ადვილად ვეტყვით და არა მგონია, ღირსება ვინმეს შევულახოთ. მძიმე სათქმელს ყველას ეტყვი და მერე გარეთ საქმე აკეთონ. შერიგება და ერთად ყოფნა სადაც ხდება, იქ უნდა მიხვიდე. ყველამ უნდა ავიტანოთ ის, რამეთუ გვაქვს დაშავებული. სანამ ღმერთი თითოეულს მოგვკითხავს, სჯობს, ერთმანეთს მშვიდობიანად დაველაპარაკოთ და ვიზრუნოთ იმისთვის, რომ ჩვენი ქვეყანა გავიყვანოთ იმ გზაზე, სადაც ასეთი სიღარიბე არ იქნება.

ბედნიერია ჩვენი ერი და განსაკუთრებით ბედნიერები ვართ ჩვენ, რომ დედაღვთისამ, ყოვლადწმინდა მარიამმა ღვთისშვილობის განცდა მოგვანიჭა თითოეულ ჩვენგანს და თუ ხელს არ ჰკრავ, ღვთისმშობელი ყველას დედაა და განსაკუთრებულია ჩვენთვის. ბედნიერები ვართ ჩვენ, ქართველები და, ზოგადად, მთელი მსოფლიო არის ბედნიერი, რომ უკვე ახალი ევა, დედაღვთისა, ყოვლადწმინდა მარიამი გვყავს. რაოდენ საოცარი ადამიანი იყო, აბა, შეხედეთ, თუ სადმე განიდიდა თავი?! როგორი მდაბალი იყო, როგორი მორჩილება ჰქონდა.

შევთხოვ დედაღვთისას, ქართველებს გონების თვალი გაგვიხილოს და მასავით თავმდაბლობის გავხდეთ. არ გვეგონოს, რომ ვინმეს რამე გვაქვს გაკეთებული. ღმერთმა ადამიანი თიხისგან შექმნა და რა გვაქვს საამაყო? განა თიხას რამე საამაყო აქვს? განა მიწას რამე საამაყო აქვს? ფეხითაც გადავუვლით მიწას, კიდევ ათას რამეს ვყრით და ვაბინძურებთ. რა უნდა ჰქონდეს საამაყო? აბა, რა არის ადამიანი, რატომ არის ასეთი დიდი? – იმიტომ, რომ ღმერთმა თავისი უკვდავი სული შთაბერა, ამით ვართ კარგები და თუ რამე ჩვენში კარგია, ეს ღვთისგან არის. თუ ჩვენ ვაკეთებთ რაღაცას, ამას ხომ ღმერთი აკეთებს ჩვენი ხელით?!

ვისაც ღმერთი არ სწამს, ის ცოდოა. ჰგონია, რაღაცას აკეთებს, მერე ვითხოვთ ერთმანეთისგან, რატომ არ მომაგებთ შესაბამის პატივს და ამ დროს უნდა გვახსოვდეს, რომ მონა ხარ, ისეთი მონა ხარ, საქმესაც რომ ვერ აკეთებ. თუ საქმეს აკეთებ, განა მონას ტაშს დაუკრავენ? რისი მონა ხარ, თუ არ გააკეთე?! შვილობა და, მით უმეტეს, მეგობრობა თუ გინდა, აბსოლუტურად სხვანაირად უნდა მოვიქცეთ ქართველები. ალბათ, შევეცდებით, რომ გამოვსწორდეთ, ერთმანეთის ნერვებსაც გავუფრთხილდეთ და ერთმანეთსაც, რომ მივიღოთ ის, რისი ღირსებიც ვართ და არ ვიყოთ იმ მდგომარეობაში, რომელსაც ჩვენს თავს თვითონ მოვუტანთ-ხოლმე“, – განაცხადა მეუფე იაკობმა.

imedinews.ge