პრეზიდენტმა ემანუელ მაკრონმა საფრანგეთის სახელმწიფო დროშა შეცვალა. ამის შესახებ lepoint.fr წერს.
საფრანგეთის დროშა კვლავ სამფერია – ლურჯ-თეთრ-წითელი, თუმცა ამიერიდან მასზე პირველი, ლურჯი ზოლი უფრო მუქი ტონალობისა – ზღვის ფერი იქნება (bleu marin).
როგორც Europe 1 იტყობინება, რომელმაც ინფორმაცია პირველმა გაავრცელა კვირას, პრეზიდენტმა მაკრონმა შესაბამის ბრძანებულებას ჯერ კიდევ 2020 წლის ივლისში მოაწერა ხელი თავისი სცენოგრაფის, არნო ჟოლანსის რჩევების გავლენით, თუმცა ოფიციალურად ამის შესახებ არ გამოცხადებულა. პრეზიდენტის იდეა მდგომარეობდა იმაში, რომ დაბრუნებოდნენ 1793 წლის დროინდელ დროშას – საფრანგეთის რევოლუციის სიმბოლოს.
აღსანიშნავია, რომ საფრანგეთის სამხედრო-საზღვაო ფლოტი და სხვა ბევრი ოფიციალური დაწესებულება ყოველთვის უფრო მუქლურჯი შეფერილობის დროშებს იყენებდნენ.
საფრანგეთში ყველა დროშა არ შეცვლილა (ჯერჯერობით მაინც). მუქლურჯი ელფერი უკვე არის დროშებზე, რომლებიც აღმართულია ოფიციალურ დაწესებულებებზე, მათ შორის, ელისეს სასახლეზე, ნაციონალური ასამბლეისა და შინაგან საქმეთა სამინისტროს შენობებზე.
Emmanuel Macron a changé le bleu du drapeau français, sur les bâtiments de la Présidence,sur les conseils de son scénographe Arnaud Jolens,à l’été 2020.
(Une info«Elysée Confidentiel»,en librairie depuis le 15/09,qui n’est pas une info Europe 1 du 14/11. Cc @LouisDeRaguenel 😉) pic.twitter.com/lcCSxeB9hD— Paul Larrouturou (@PaulLarrouturou) November 14, 2021
ამასთან, ვრცელდება ინფორმაცია, რომ ელისეს სასახლეში დროშის ახალ შეფერილობასთან დაკავშირებით გარკვეული უთანხმოებები წარმოიშვა. პრეზიდენტ მაკრონის გადაწყვეტილების მოწინააღმდეგეების არგუმენტია ის, რომ ახალი ფერი ულამაზოა და თან ევროკავშირის დროშის ფერს არ ემთხვევა. მათი აზრით, აქედან გამომდინარე, ფერის შეცვლა შეიძლება ევროკავშირის საწინააღმდეგო ჟესტად იყოს აღქმული (შეგახსენებთ, რომ საფრანგეთი 2022 წლის იანვრიდან ევროკავშირის თავმჯდომარე ქვეყანა ხდება).
დროშა, რომელიც 1789 წლის რევოლუციას უკავშირდება
„მარსელიეზასა“ და დევიზთან ერთად „თავისუფლება, თანასწორობა, ძმობა“ («Liberté, Égalité, Fraternité») დროშა სამი ვერტიკალური ზოლით საფრანგეთის ერთ-ერთი ემბლემაა. მართალია საფრანგეთის დროშა 200 წელზე მეტია, არ შეცვლილა, მაგრამ ფერების ტონების შეცვლის პრეცედენტი არსებობს: 1976 წელს პრეზიდენტმა ვალერი ჟისკარ დ’ესტენმა გადაწყვიტა დროშაზე ლურჯი და წითელი ფერები გაეღიავებინათ, რადგან ისინი მეტისმეტად „საბრძოლო ჩანდა“ და, ამასთან, ღია ლურჯი უფრო შეესაბამებოდა ევროკავშირის დროშის ლურჯს, რომლის გვერდზეც არის ხოლმე უმეტესწილად საფრანგეთის დროშა.
ნინო ხოშტარია
კომენტარები