fbpx
მედიცინა

კიდევ ერთი ახალი წამალი კოვიდის წინააღმდეგ – „ფაიზერის“ მიერ შექმნილმა პრეპარატმა მაღალი ეფექტიანობა აჩვენა

აშშ-ის ხელისუფლება და „ფაიზერი“ ახალი მედიკამენტის მილიონობით დოზის მიწოდებაზე შეთანხმდნენ

პრეპარატი Paxlovid-ი კაფსულების სახით კოვიდ-19-ით დაავადებულთა ჰოსპიტალიზაციისა და სიკვდილის რისკს 89%-ით ამცირებს, – ნათქვამია  ამერიკული ფარმაცევტული კომპანია Pfizer-ის განცხადებაში, რომელიც 5 ნოემბერს გავრცელდა. კომპანია ემზადება, რომ კლინიკური ცდების შედეგები აშშ-ის წამლისა და საკვების ხარისხის რეგულატორს –  FDA-ს დაუყოვნებლივ გადასცეს. 

ამერიკულმა ფარმაცევტულმა კომპანიამ Pfizer-მა პარასკევს, 5 ნოემბერს, წარმოადგინა მონაცემები COVID-19-ის ახალი წამლის კლინიკური კვლევების მეორე ფაზის შესახებ. პრეპარატის შემქმნელები აღნიშნავენ, რომ წამალი კაფსულების სახით, სახელწოდებით Paxlovid-ი, კორონავირუსული ინფექციით დაავადებული პაციენტის ჰოსპიტალიზაციის და სიკვდილის რისკს 89 პროცენტით ამცირებს.

ამრიგად, იმ ჯგუფის მონაწილეთაგან, რომლებიც პრეპარატს კოვიდის სიმპტომების დაწყებიდან 3 დღის განმავლობაში იღებდნენ, მხოლოდ მხოლოდ 0,8 პროცენტი მოხვდა საავადმყოფოში, პლაცებოს ჯგუფში (რომლებიც ცარიელ კაფსულას იღებდნენ, თუმცა ეგონათ, რომ პაქსლოვიდით მკურნალობდნენ) კი ეს მაჩვენებელი 7 პროცენტს აღწევდა. გარდა ამისა, მათგან, ვინც პაქსლოვიდით მკურნალობდა, არავინ გარდაცვლილა, პლაცებო ჯგუფიდან კი 1,6 პროცენტი გარდაიცვალა.

Pfizer-მა ხაზი გაუსვა ახალი წამლის „განსაცვიფრებელ ეფექტიანობას“ Covid-19-ის მკურნალობაში. პრეპარატის შემქმნელები აპირებენ მონაცემები დაუყოვნებლივ გადასცენ აშშ-ის სურსათისა და წამლების ადმინისტრაციას (FDA) დასამტკიცებლად.

ამასთან, Financial Times-ის ცნობით, კომპანია „ფაიზერი“ უკვე აფორმებს პირველ კონტრაქტებს პაქსლოვიდის მიწოდებასთან დაკავშირებით რიგ ქვეყანასთან. ავსტრალია უკვე დათანხმდა 500 ათასი დოზის შეძენას, დიდი ბრიტანეთი – 250 ათასი დოზის, სამხრეთ კორეა – 70 ათასის.

გავრცელდა ინფორმაცია, რომ აშშ-ის ხელისუფლება და კომპანია „ფაიზერი“ კოვიდ-19-ის საწინააღმდეგო ახალი კაფსულების მილიონობით დოზის მიწოდებაზე შეთანხმდნენ, – ამის შესახებ აშშ-ის პრეზიდენტმა, ჯო ბაიდენმა განაცხადა.

ბაიდენის თქმით, აშშ-ის საკვების და მედიკამენტის ადმინისტრაციის ავტორიზაციის შემთხვევაში ქვეყანას შესაძლოა მალევე ჰქონდეს აბები და ვირუსით ინფიცირებულებს უმკურნალოს.

კოვიდსაწინააღმდეგო აბები მსოფლიოში პირველად დიდმა ბრიტანეთმა დაამტკიცა ერთი დღით ადრე „ფაიზერის“ განცხადებამდე. პრეპარატმა Lagevrio-მ (მოლნუპირავირი), რომელიც  ამერიკული ფარმაცევტული კომპანიების – Merck-ისა და Ridgeback Biotherapeutics-ის თანამშრომლობით იწარმოება, უსაფრთხოება და მაღალი  ეფექტიანობა აჩვენა ჰოსპიტალიზაციისა და სიკვდილის რისკის შემცირების მხრივ  COVID-19-ის მსუბუქი და ზომიერი ფორმის მქონე პაციენტების მკურნალობისას.

ნინო ხოშტარია

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close