სოხუმში ვლადისლავ არძინბას ძმისშვილი მოკლეს
სოხუმში თვითგამოცხადებული აფხაზეთის რესპუბლიკის პირველი ე. წ. პრეზიდენტის, ვლადისლავ არძინბას ძმისშვილი – ქემალ არძინბა მოკლეს.
kavkazr.com-ის ინფორმაციით, მას სნაიპერის ტყვიები საკუთარ სახლში მოხვდა. შსს-ს პრესსამსახურის ცნობით, სოხუმის ცენტრში, იმამ შამილის ქუჩის 6 ნომერთან სროლის შესახებ შეტყობინება პოლიციაში 18 მაისს, სამშაბათს, 17:40 სთ-ზე შევიდა. დაჭრილი ქემალ არძინბა რესპუბლიკურ საავადმყოფოში გადაიყვანეს, სადაც იგი მალევე გარდაიცვალა.
გამოცემის ცნობით, მოკლულს მართალია ე. წ. კანონიერი ქურდის ოფიციალური სტატუსი არ ჰქონია, მაგრამ კრიმინალურ სამყაროში გავლენებით სარგებლობდა.
ადგილობრივი მედიის ვარაუდით, მკვლელობა შურისძიების ნიადაგზე მოხდა. საქმე ისაა, რომ ქემალ არძინბას უკავშირებენ აფხაზეთში მომხდარ რამდენიმე კრიმინალურ გარჩევას, მათ შორის, მკვლელობას სოხუმის ცენტრში 2019 წელს, როდესაც რესტორან „სან რემოში“ ორი ე. წ. კანონიერი ქურდი – ასტამურ შამბა და ალხას ავიძბა ჩაცხრილეს. მაშინ ბრმა ტყვიამ მიმტანი გოგონა, დომინიკა აკირთავაც იმსხვერპლა.
გავრცელებული ინფორმაციით, ქემალ არძინბაზე თავდასხმა 2004 წელსაც მოხდა, გასულ წელს კი მოკლული კრიმინალური ავტორიტეტების დაჯგუფების წევრებმა ვლადისლავ არძინბას სახლი დაცხრილეს. ისინი, სავარაუდოდ, ქემალ არძინბას ეძებდნენ.
რამდენადაც ვლადისლავ არძინბას (გარდაიცვალა 2010 წელს) მამრობითი სქესის პირდაპირი მემკვიდრე არ ჰყოლია (მას ერთი ქალიშვილი ჰყავს – მადინა), იგი ქემალ არძინბას მიიჩნევდა ვაჟიშვილად, ქემალმა შესაბამისი როლიც მიიღო როგორც ოჯახში, ისე საზოგადოებაში.
ქემალ არძინბა აფხაზეთში ერთ-ერთ ყველაზე მდიდარ ადამიანად ითვლებოდა, მისი შემოსავალი სხვადასხვა ბიზნესიდან მიღებული წილები იყო, მათ შორის, აფხაზეთის ტურისტული ბიზნესიდან, რომელსაც იგი სრულად აკონტროლებდა.
ქემალ არძინბას სახლი სოხუმის ცენტრში დაახლოებით 1000 კვ. მ ფართობზეა გაშენებული და, გავრცელებული ცნობებით, ისეთი დაცული იყო, რომ „ჩიტი ვერ გადაფრინდებოდა“.
დამნაშავეების გამოსავლენად ოპერატიულ-სამძებრო ღონისძიებები მიმდინარეობს. დაკეტილია სოხუმის შესასვლელ-გასასვლელები. ჯერჯერობით თავდამსხმელი არ არის იდენტიფიცირებული.
ცნობისთვის, 2003 წლის 2 სექტემბერს გუდაუთაში ვლადისლავ არძინბას ბიძაშვილი, ბიზნესმენი ლევან არძინბა მოკლეს. მედიის ინფორმაციით, ლევან არძინბა თამბაქოს ბიზნესით იყო დაკავებული აფხაზეთსა და რუსეთში.
2003 წლის დასაწყისში მოკლეს ლევან არძინბას ძმა – აკაც.
მოამზადა ნუცა ყაველაშვილმა
კომენტარები