ლომბარდიის (დედაქალაქი – მილანი) რეგიონის მაჩვენებლები უკვე „ნარინჯისფერი ზონის“ ნორმებს შეესაბამება და არა „წითელ ეპიდემიოლოგიურ ზონას“, – ამის შესახებ დღეს, 8 აპრილს რეგიონის პრეზიდენტმა ატილიო ფონტანამ განაცხადა.
საუბარია ისეთ მაჩვენებლებზე, როგორიცაა ინფექციის გავრცელების ინდექსი (Rt) და საავადმყოფოების დატვირთვის დონე. რეგიონის მთავრობა ვარაუდობს, რომ ლომბარდიის „ფერი“ უკვე უახლოეს გამოსასვლელ დღეებში – 10-11 აპრილს შეიცვლება და, შესაბამისად, შეზღუდვებიც შემსუბუქდება.
8 აპრილს საღამოს გამოქვეყნებული მონაცემების თანახმად, იტალიაში კორონავირუსით ინფიცირების 17 221 ახალი შემთხვევა დაფიქსირდა (გუშინ – 13 708), 487 ადამიანი კი გარდაიცვალა (გუშინ – 627). აღსანიშნავია, რომ გასულ 24 საათში 362162 ტექსტი ჩატარდა და პოზიტიურობის მაჩვენებელმა 4,7% შეადგინა (გუშინ – 4%).
ამ დროისთვის კორონავირუსის მსხვერპლთა მთლიანი რაოდენობა ქვეყანაში 112 861-ს აღწევს, ხოლო კორონავირუსით დაინფიცირებულთა მთლიანი რაოდენობა, გამოჯანმრთელებულთა და გარდაცვლილთა ჩათვლით – 3 717 602-ს, რაც ქვეყნის მოსახლეობის 6%-ზე მეტია.
8 აპრილის მდგომარეობით, ვაქცინის ორივე დოზა უკვე მიიღო 3 653 666-მა ადამიანმა, რაც იტალიის მოსახლეობის 6,07%-ს შეადგენს, პირველი დოზა კი – 8 318 451-მა მოქალაქემ. ხელისუფლება და სპეციალისტები ვაქცინაციის ტემპების დაჩქარების აუცილებლობაზე საუბრობენ.
როგორც ჩვენი მკითხველისთვის ცნობილია, იტალიის ხელისუფლებამ დღეს მიიღო გადაწყვეტილება, რომ „ასტრაზენეკას“ პრეპარატით აცრა 60 წელზე მეტი ასაკის პირებში ჩატარდება.
ნინო ხოშტარია
კომენტარები