fbpx
მედიცინა

მეცნიერებმა კბილების ხელახალი გაზრდის მეთოდს მიაგნეს

იაპონიაში მდებარე კიოტოს, ოსაკისა და ფუკუის უნივერსიტეტებში მომუშავე მეცნიერებმა აღმოაჩინეს ანტისხეული, რომელმაც შესაძლოა, კონკრეტულ გენზე ზემოქმედების მეშვეობით ადამიანებში დაკარგული კბილების ხელახალ გაზრდას შეუწყოს ხელი. მკვლევართა ახალი ნაშრომი გამოცემა Science Advances-ში გამოქვეყნდა.

იაპონელ მეცნიერთა განცხადებით, კბილების გაზრდაში, ისევე, როგორც სხვადასხვა ორგანოსა და ქსოვილის განვითარებაში, უდიდეს როლს ასრულებენ ძვლის მორფოგენეტიკური ცილის (BMP) Wnt-ს სახელით ცნობილი სასიგნალო მოლეკულები. მათზე პირდაპირმა ზემოქმედებამ შესაძლოა ორგანიზმში სერიოზული დარღვევები გამოიწვიოს. აქედან გამომდინარე, სპეციალისტებმა სამიზნე ობიექტად ერთ-ერთი გენი, USAG-1 აარჩიეს, რომელიც ამ ნაერთებთან მჭიდრო კავშირშია, თანაც მისი გაუვნებელყოფა კბილების წარმოქმნას ასტიმულირებს.

დათრგუნული გენის USAG-1 მქონე თაგვის სარძევე კბილიდან ამოზრდილი ახალი კბილი. ფოტო: Kyoto University

ნაშრომის ავტორებმა კბილების თანდაყოლილი აგენეზისის მქონე ორსულ თაგვებზე ჩატარებული ექსპერიმენტის ფარგლებში USAG-1-ის დათრგუნვა მონოკლონალური ანტისხეულებით სცადეს, რომელთა უმრავლესობაც ახალშობილ მღრღნელებში ჯანმრთელობის მნიშვნელოვან პრობლემებს დაედო საფუძვლად. აღნიშნული ცილებიდან ერთმა კი ზემოხსენებულ გენსა და BMP-ს შორის კავშირი წარმატებით დაარღვია, რასაც შედეგად ცხოველებში კბილების სრულად გაზრდა მოჰყვა. იგივე ეფექტი დაფიქსირდა ქრცვინების შემთხვევაშიც, რომელთაც ადამიანთა მსგავსი დენტალური წარმონაქმნები აქვთ.

მეცნიერები არ გამორიცხავენ, რომ ახალი მეთოდი მომავალში ადამიანის კბილების რეგენერირებაშიც დაგვეხმაროს, თუმცა მანამდე კიდევ არაერთი კვლევის ჩატარებაა საჭირო. მომდევნო ეტაპზე ისინი მონოკლონალური ანტისხეულების გამოცდას ისეთ ცხოველებზე გეგმავენ, როგორებიც არიან ღორი და ძაღლი.

popx.ge

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close