fbpx
მედიცინამსოფლიოიტალია

საფრანგეთმა„ასტრაზენეკას“ ვაქცინით მოქალაქეების აცრა განაახლა, იტალია და გერმანია ხვალიდან განაახლებენ

ევროპის წამლის სააგენტომ (EMA) დღეს გაავრცელა განცხადება, რომ „ასტრაზენეკას“ ვაქცინით აცრა უსაფრთხოა, ეფექტიანია და უპირატესობა რისკებს აჭარბებს. „თრომბოზთან ურთიერთკავშირს გამოვრიცხავთ“, – განაცხადა სააგენტოს დირექტორმა ემერ კუკმა. 

ამასთან, მისივე თქმით, არ შეიძლება გამოირიცხოს თრომბოემბოლიის იშვიათი შემთხვევები, ამიტომ ამის შესახებ პერსონალი გაფრთხილებული უნდა იყოს.

EMA-ს უსაფრთხოების კომისიამ ვერ აღმოაჩინა პრობლემები, რომლებიც „ვაქცინის ხარისხთან ან პარტიებთან“ იქნებოდა დაკავშირებული, აცხადებს სააგენტო და დასძენს, რომ გააგრძელებენ მოკვლევას, რათა უფრო მეტი ინფორმაცია იყოს ცნობილი იმ იშვიათი არასასურველი ფაქტების შესახებ, რომლებიც ვაქცინაციის შემდეგ განვითარდა.

ევროპის წამლის სააგენტოს ამ განცხადების გავრცელებიდან მალევე საფრანგეთმა „ასტრაზენეკას“ ვაქცინით აცრა განაახლა. იტალია „ასტრაზენეკას“ ვაქცინით მოქალაქეების აცრას ხვალიდან, ადგილობრივი დროით 15:00 სთ-იდან განაახლებს. ინფორმაციას „ანსა“ ავრცელებს.

ქვეყანამ ამ პრეპარატით ვაქცინაცია გასულ ორშაბათს შეწყვიტა, მას შემდეგ, რაც „ასტრაზენეკას“ ვაქცინით აცრის შემდეგ გარდაცვალების რამდენიმე  ფაქტი დაფიქსირდა (მთლიანობაში 8 შემთხვევაზეა საუბარი), თუმცა აცრასა და გარდაცვალებას შორის კავშირი ჯერჯერობით დადგენილი არ არის.

ხვალიდან, 19 მარტიდან „ასტრაზენეკას“ პრეპარატით ვაქცინაციის განახლებას გეგმავენ გერმანია, კვიპროსი, ლატვია და ლიეტუვაც, მომდევნო კვირიდან კი – ესპანეთი.

ნორვეგია და შვედეთი კი ნაადრევს უწოდებენ შვედურ-ბრიტანული კონცერნის ვაქცინით აცრის განახლებას და, სულ ცოტა, ერთი კვირა მოცდას აპირებენ იმ ინფორმაციის მოლოდინში, რომელიც EMA-ს მიერ ჩატარებული კვლევების შედეგად იქნება მიღებული. „AstraZeneca-თი ვაქცინაცია შეჩერებული იქნება მანამ, სანამ სიტუაციის სრული სურათი არ გვექნება“, – განაცხადა პრესკონფერენციაზე შვედეთის საზოგადოებრივი ჯანდაცვის ინსტიტუტის დირექტორმა კამილა სტოლტენბერგმა.

ნორვეგია პირველი ქვეყანა იყო, რომელმაც აცრის შემდეგ განვითარებული თრომბოემბოლიის მძიმე შემთხვევების შესახებ განაცხადა.

ნინო ხოშტარია

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close