ინტერნეტით 2 მლნ ლარის ღირებულების ნარკოტიკი გაიყიდა: დაკავებულია დანაშაულებრივი ჯგუფი
ფონიჭალის დასახლებასა და გარდაბანში ნარკოტიკებით ვაჭრობისთვის ოთხი პირია დაკავებული, – ამის შესახებ შინაგან საქმეთა სამინისტრო იუწყება.
დაკავებულებს 8-იდან 20 წლამდე ვადით თავისუფლების აღკვეთა ემუქრებათ.
გამოძიებით დადგინდა, რომ ბრალდებულებს შემუშავებული ჰქონდათ ნარკოტიკების რეალიზაციის დანაშაულებრივი სქემა, რომლის საშუალებითაც ისინი ფინანსურ რესურსებს მართავდნენ ინტერნეტ-ტოტალიზატორის გამოყენებით.
დანაშაულებრივი ჯგუფის წევრები ნარკოტიკული საშუალებების რეალიზაციას კი ე.წ. „დადების“ მეთოდით ახდენდნენ. ორი მათგანი დაინტერესებულ პირებს ტელეფონით უკავშირდებოდა, გარკვეული თანხის სანაცვლოდ სთავაზობდა ნარკოტიკების შეძენას, აწვდიდა ონლაინ ტოტალიზატორის ანგარიშის ნომრებს და თანხებს არიცხვინებდა. ამის შემდგომ კი ისინი აღნიშნულ პირებს აწვდიდნენ იმ ადგილების მისამართებს, სადაც უკვე განთავსებული იყო ნარკოტიკული საშუალებები.
უწყების ცნობით, მიმდინარე წლის მანძილზე, ონლაინ ტოტალიზატორის ანგარიშის გამოყენებით, ნარკოტიკული საშუალებების რეალიზაციის შედეგად მიღებულმა თანხამ ორ მილიონამდე ლარი შეადგინა.
პოლიციამ დაკავებულების საცხოვრებელი სახლების და ავტომანქანის ჩხრეკისას ნარკოტიკული საშუალება „ჰეროინი“, დიდი ოდენობით თანხა, ასევე, მათი კუთვნილი მობილური ტელეფონები და საბანკო ბარათები ნივთმტკიცებად ამოიღო.
კომენტარები