fbpx
საზოგადოებასაქართველო

საქართველოში ახალი კორონავირუსით ინფიცირების შემთხვევების რაოდენობამ 800-ს მიაღწია

გამოვლენილი 4 ახალი ინფიცირებულიდან 3 სატვირთო მანქანის მძღოლია

დღეს დილის მონაცემებით, საქართველოში კორონავირუსის ოთხი ახალი შემთხვევა გამოვლინდა და ინფიცირების შემთხვევების საერთო რაოდენობამ, გამოჯანმრთელებულთა და გარდაცვლილთა ჩათვლით, 800-ს მიაღწია. გუშინ დილით 2 ახალი შემთხვევა იყო, გუშინწინ – 11.

თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, საქართველოში გამოვლენილი ოთხი ახალი შემთხვევიდან სამი სატვირთო ავტომობილის მძღოლია, ხოლო ერთი საბურთალოს კლასტერიდან დადასტურებული შემთხვევის კონტაქტს წარმოადგენს. მისივე თქმით, თბილისის ინფექციურ საავადმყოფოში ე. წ. საბურთალოს კლასტერიდან 20-ზე მეტი პაციენტი მკურნალობს.

გამოჯანმრთელდა კიდევ ექვსი პაციენტი და გამოჯანმრთელებულთა რაოდენობა 640-მდე გაიზარდა, რაც ინფიცირების საერთო მაჩვენებლის 80%-ს შეადგენს.

ახალი კორონავირუსის შედეგად ქვეყანაში ეპიდემიის დაწყებიდან დღემდე 13 პაციენტია გარდაცვლილი. მე-13 პაციენტი, 75 წლის მამაკაცი სოფელ მუშევანიდან (ბოლნისის მუნიციპალიტეტი) გუშინ საღამოს გარდაიცვალა რესპუბლიკურ საავადმყოფოში. ექიმების თქმით, მას რამდენიმე თანმხლები დაავადება აღენიშნებოდა.

ამჟამად კარანტინის რეჟიმში 2424 მოქალაქე იმყოფება, ხოლო სტაციონარში მეთვალყურეობის ქვეშ – 304.

ნინო ხოშტარია

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close