საქართველოში კორონავირუსით ინფიცირებულთა რიცხვი გაიზარდა
ინფიცირებულებიდან 4 ბავშვია, რაც შედარებით მაღალი პროცენტია
საქართველოში კორონავირუსის 4 ახალი შემთხვევა დადასტურდა და ინფიცირების შემთხვევების რაოდენობა 38-მდე გაიზარდა. მათგან ერთი – პირველი პაციენტი, 50 წლის მამაკაცი, რომელიც აზერბაიჯანის გავლით ირანიდან შემოვიდა, გამოჯანმრთელდა და ინფექციური საავადმყოფოდან 16 მარტს გაწერეს, თუმცა 2 კვირა თვითიზოლაციაში იქნება. კიდევ ერთი პაციენტის გამოჯანმრთელების საბოლოო დადასტურებას ელოდებიან.
stopcov.ge-ს მონაცემებით, რომელიც ცოტა ხნის წინ განახლდა, ამ დროისთვის კარანტინის რეჟიმში იმყოფება 1130 ადამიანი, ხოლო სტაციონარში მეთვალყურების ქვეშ – 81 პაციენტი.
საქართველოში კორონავიურსის ოთხი ახალი დადასტურებული შემთხვევიდან ორი პაციენტი თბილისის ინფექციურ საავადმყოფოშია მოთავსებული. ამის შესახებ თბილისის ინფექციური საავადმყოფოს სამედიცინო დირექტორმა მარინა ეზუგბაიამ განაცხადა.
მისი თქმით, ინფექციურში მოთავსებული ორივე პაციენტის კონტაქტი დადგენილია.
„შემოგვემატა ოთხი ახალი ინფიცირებული დადასტურებული შემთხვევა. სულ გამოდის 38 დადასტურებული შემთხვევა. ჩვენთან მოთავსებული პაციენტების ისტორია ასეთია, ეს არის ერთ-ერთი პაციენტის კონტაქტები“, – განაცხადა ეზუგბაიამ.
ორ ახალ ინფიცირებულთან, რომლებიც ჩვენთან არიან გადმოყვანილი, შეინიშნება ტემპერატურის მატება დაბალი ციფრებით, 37-იდან 37,5 -მდე, მინიმალურად გამოხატული კლინიკაა. რაც შეეხება ბავშვების მდგომარეობას, ბავშვების ჯანმრთელობის მდგომარეობა, საბედნიეროდ, სტაბილურია“, – განაცხადა ეზუგბაიამ.
მისივე თქმით, გუშინ ტესტირება ჩაუტარდა 21 პაციენტს, აქედან 19 პაციენტთან მიიღეს უარყოფითი პასუხი, ორ პიროვნებასთან კი კორონავირუსი დადასტურდა.
აღსანიშნავია, რომ 38 შემთხვევიდან 4 ბავშვია. მარინა ეზუგბაიას ინფორმაციით, კორონავირუსით ინფიცირებული ოთხი არასრუწლოვანის ჯანმრთელობის მდგომარეობა სტაბილურია და მათთან დაავადების პროგრესირება არ შეინიშნება.
„გვყავს ოთხი ბავშვი. მათი ჯანმრთელობის მდგომარეობა სტაბილურია, რაც ნიშნავს, რომ დაავადების პროგრესირება არ შეინიშნება“, – განაცხადა ეზუგბაიამ.
კითხვაზე, ითვლება თუ არა დაავადების მაღალ მაჩვენებლად არასრუწლოვანთა რაოდენობა, ეზუგბაია ამბობს, რომ „ეს ჩაითვლება შედარებით მაღალ პროცენტად, სხვა ქვეყნებისგან განსხვავებით. თუ არ შემოგვემატება ბავშვთა ასაკი, ეს პროცესი დაიწევს და გაუთანაბრდება იმ მონაცემებს, რაც არის სხვა ქვეყნებში“, – განაცხადა ეზუგბაიამ.
როგორც ცნობილია, გუშინ, 17 მარტს საქართველოს პრემიერ-მინისტრმა გიორგი გახარიამ განაცხადა, რომ კორონავირუსის შეჩერების ეტაპიდან ვირუსის გავრცელების შენელების ფაზაზე გადავდივართ, რაც ნიშნავს, რომ მოსალოდნელია ვირუსის გავრცელება და მთავრობა ამისთვის სათანადო ზომებს გაატარებს.
კომენტარები