თურქეთის ხელისუფლებამ საბერძნეთში გადასვლის მცდელობის დროს 220 მიგრანტი დააკავა. ამის შესახებ „როიტერი“ იუწყება.
საერთაშორისო საინფორმაციო სააგენტოს ცნობით, არალეგალი მიგრანტები ევროპაში მოხვედრას ხმელთაშუა ზღვის გავლით ცდილობდნენ. ისინი თურქეთიდან საბერძნეთის კუნძულ ლესბოსზე უნდა გადასულიყვნენ, თუმცა ჩანაქკალეს პროვინციის სანაპირო დაცვამ მიგრანტები ხმელთაშუა ზღვაში დააკავა და უკან დააბრუნა.
„როიტერის“ ცნობით, მაშველებს ყველა მიგრანტის სანაპიროზე გადასაყვანად ხუთი ოპერაციის ჩატარება დასჭირდათ.
ხმელთაშუა ზღვა ახლო აღმოსავლეთიდან და აფრიკიდან წამოსული მიგრანტებისთვის ევროპაში მოსახვედრი გზაა.
ყველაზე დიდი ნაკადი მიგრანტთა მასშტაბური კრიზისის დროს, 2015 წელს დაფიქსირდა, როდესაც ხმელთაშუა ზღვის საშუალებით ევროპას მილიონამდე არალეგალი მიადგა. მას შემდეგ მიგრანტთა ნაკადი შემცირდა, თუმცა ახალი ცხოვრების დაწყების მიზნით სახიფათო მარშრუტს დღემდე ასობით ადამიანი იყენებს.
1tv.ge
კომენტარები