საბერძნეთის ულამაზესი კუნძული კერკირა ბერძნულ-ქართულ ფორუმს მესამედ უმასპინძლებს
![](https://nostal.ge/wp-content/uploads/2018/11/kerkira-11.jpg)
ათენის განათლებისა და კულტურის ცენტრმა „კავკასიამ“ საბერძნეთში რამდენიმე მნიშვნელოვანი ღონისძიება მიუძღვნა საქართველოს პირველი რესპუბლიკის დაარსების 100 წლისთავს. ამ ღონისძიებათა ციკლის ბოლო აკორდი იქნება საქველმოქმედო კონცერტი კუნძულ კერკირის (საბერძნეთი) დედაქალაქში „ბერძნულ-ქართულ კულტურათა III დიალოგის“ („3ο Αντάμωμα Πολιτισμών Ελλάδας – Γεωργίας στην Κέρκυρα“) ფარგლებში.
საქველმოქმედო კონცერტი გაიმართება პირველ დეკემბერს ქ. კერკირის მუნიციპალიტეტის 800-კაციანი თეატრის დარბაზში (Δημοτικό Θέατρο της Κέρκυρας; დასაწყისი 20:00 საათზე). ღონისძიებაში მონაწილეობენ „სინიელთა კულტურულ-საგანმანათლებლო ასოციაციის“, ათენის განათლებისა და კულტურის ცენტრ „კავკასიის“ მუსიკალურ-ქორეოგრაფიული კოლექტივები და ცნობილი კერკირელი მუსიკოსები.
პარალელურად მოეწყობა ქართული ხელნაკეთი სამკაულების, ემიგრანტი ხელოვანების ნამუშევრების, ხალხური რეწვის, წიგნებისა და საქართველოს კულტურის ამსახველი საილუსტრაციო მასალის გამოფენა-გაყიდვა. შემოსული თანხა ორივე ასოციაციის საქველმოქმედო მიზნებს მოხმარდება.
ღონისძიების ინიციატორები არიან კ. კერკირის „სინიელთა კულტურულ-საგანმანათლებლო ასოციაცია“ (თავმჯდომარე – იოანის გარნელისი) და ათენის განათლებისა და კულტურის ცენტრი „კავკასია“ (დამფუძნებელი – ავთანდილ მიქაბერიძე) და ხორციელდება ორივე ასოციაციის მეგობრული ურთიერთთანადგომითა და თვითდაფინანსებით.
ეს მესამე ბერძნულ-ქართული ფორუმია კუნძულ კერკირაზე. პირველი ფორუმი 2014 წლის 11-12 იანვარს გაიმართა, ათენის განათლებისა და კულტურის ცენტრ „კავკასიის“ ინიციატივით, ადგილობრივ კულტურულ-საგანმანათლებლო ასოციაციასთან თანამშრომლობით – კ. კერკირის დედაქალაქში მოეწყო „ბერძნულ-ქართულ კულტურათა დიალოგი“ მუნიციპალიტეტისა და სავაჭრო-სამრეწველო პალატის, საბერძნეთის რესპუბლიკაში საქართველოს საელჩოსა და საბერძნეთის ხელოვნების, ლიტერატურისა და მეცნიერების UNESCO-ს ასოციაციის ეგიდითა და ხელშეწყობით. ამავე ორგანიზაციების თაოსნობითა და ხელშეწყობით ჩატარდა მეორე ფორუმიც კუნძულ კერკირაზე 2016 წლის 8-10 იანვარს.
წლევანდელი ღონისძიება, როგორც აღვნიშნეთ, საქართველოს დამოუკიდებლობის 100 წლისთავს ეძღვნება და შესანიშნავი ინიციატივაა საქართველოს ღირსეულად წარმოსაჩენად საბერძნეთის რესპუბლიკაში.
დამატებითი ინფორმაციისთვის დარეკეთ: 210 7211226 / 6999 640412 / 6995 956444
![](https://nostal.ge/wp-content/uploads/2018/11/kerkira-212x300.jpg)
კომენტარები